უკრაინის პრეზიდენტის განცხადება უნგრეთისა და უკრაინის საგარეო საქმეთა მინისტრების დაპირისპირების მიზეზი გახდა. ვოლოდიმირ ზელენსკიმ კომენტარი ნავთობსადენ „დრუჟბას“ აფეთქებაზე გააკეთა, რომლითაც უნგრეთს რუსული ნავთობი მიეწოდება.
უკრაინის ლიდერმა განაცხადა, რომ ყოველთვის მხარს უჭერდა უნგრეთთან მეგობრობას, თუმცა ახლა „დრუჟბის“ არსებობა უნგრეთის პოზიციაზეა დამოკიდებული.
უნგრეთის საგარეო საქმეთა მინისტრმა ზელენსკის სოციალურ ქსელში უპასუხა. პიტერ სიიარტომ ის უნგრეთის დაშინების მცდელობაში დაადანაშაულა და მოუწოდა, უნგრეთის ენერგოუსაფრთხოებაზე თავდასხმები შეწყვიტოს.
სიიარტოს სოციალურ ქსელშივე გამოეხმაურა უკრაინის საგარეო უწყების ხელმძღვანელი. ანდრეი სიბიგამ უნგრელ კოლეგას შეახსენა, რომ უკრაინის პრეზიდენტს მისი ჭკუის სწავლება არ სჭირდება, ენერგეტიკული უსაფრთხოებისთვის კი ბუდაპეშტმა სექტორის დივერსიფიკაციაზე უნდა იმუშაოს და რუსეთისგან დამოუკიდებელი გახდეს.