“ზელენსკი ღიად ემუქრება უნგრეთს, აღიარა რომ უკრაინა ახორციელებს დარტყმებს ნავთობსადენ “დრუჟბაზე“, ეს უშედეგოდ არ ჩაივლის”

უნგრეთის პრემიერ-მინისტრის, ვიქტორ ორბანის განცხადებით, უნგრეთის მისამართით ვოლოდიმირ ზელენსკის „ღია მუქარა“ უშედეგოდ არ ჩაივლის.

„ზელენსკი ღიად ემუქრება უნგრეთს. მან აღიარა, რომ უკრაინა ახორციელებს დარტყმებს ნავთობსადენ „დრუჟბაზე“, რადგან ჩვენ არ ვუჭერთ მხარს მათ გაწევრიანებას ევროკავშირში. ეს კიდევ ერთხელ არის მტკიცებულება, რომ უნგრელებმა სწორი გადაწყვეტილება მიიღეს“, – წერს ორბანი სოციალურ ქსელში.

ორბანის განცხადებით, უკრაინა ევროკავშირში წევრობას შანტაჟის, აფეთქებების და მუქარის გზით ვერ უზრუნველყოფს. მისივე თქმით, ზელენსკის სიტყვები უშედეგოდ არ ჩაივლის.

ცნობისთვის, გასულ კვირას უკრაინის შეიარაღებულმა ძალებმა რამდენიმე დარტყმა მიიტანეს ნავთობსადენ „დრუჟბაზე“, რომლითაც რუსულ ნავთობს უნგრეთი და სლოვაკეთი იღებენ. დარტყმების შედეგად ამ ქვეყნებში ნავთობის მიწოდება დროებით შეწყდა. 24 აგვისტოს უკრაინის პრეზიდენტს დაუსვეს კითხვა, ნავთობსადენ „დრუჟბაზე“ მიტანილმა იერიშებმა გაზარდა თუ არა შანსი, უნგრეთი უკრაინის ევროკავშირში გაწევრიანებაზე ვეტოს მოხსნის, რაზეც ზელენსკიმ უპასუხა: „ჩვენ ყოველთვის ვუჭერთ მხარს მეგობრობას უკრაინასა და უნგრეთს შორის და ახლა ამ „დრუჟბის“ (მეგობრობის) არსებობა დამოკიდებულია უნგრეთზე“. ზელენსკის ამ განცხადებას ბუდაპეშტში ღია მუქარა და უნგრეთის სუვერენიტეტზე თავდასხმა უწოდეს.