სლოვაკეთის საგარეო საქმეთა მინისტრი იურაი ბლანარი მოუწოდებს უკრაინას, თავი შეიკავოს ნავთობსადენ „დრუჟბაზე“ დარტყმებისგან.
როგორც სლოვაკური მედია წერს, იურაი ბლანარმა ბოლო დღეების განმავლობაში ნავთობსადენ „დრუჟბას“ გარშემო შექმნილი ვითარება უკრაინის საგარეო საქმეთა მინისტრთან, ანდრე სიბიგასთან და უკრაინის ვიცე-პრემიერთან, ტარას კაჩკასთან სატელეფონო საუბრისას განიხილა.
„დარტყმები „დრუჟბაზე“ ზიანს აყენებს არა მხოლოდ სლოვაკეთს, არამედ უკრაინასაც“, – განაცხადა სლოვაკეთის საგარეო საქმეთა მინისტრმა.
მისივე თქმით, უკრაინის ხელისუფლება დაინტერესებულია ორ ქვეყანას შორის ურთიერთობებში კონსტრუქციული მიდგომით.
ბლანარმა ასევე აღნიშნა, რომ მიმდინარეობს მოსამზადებელი სამუშაოები სლოვაკეთისა და უკრაინის მთავრობების ერთობლივი სხდომის ჩასატარებლად. სლოვაკეთის საგარეო საქმეთა მინისტრის ცნობით, ეს იქნება მესამე შეხვედრა, რომელიც მსგავს ფორმატში გაიმართება.
იურაი ბლანარმა ასევე დაადასტურა, რომ სლოვაკეთი მხარს უჭერს უკრაინის ამბიციას, გაწევრიანდეს ევროკავშირში, იმ პირობით, რომ კიევი ყველა პირობას შეასრულებს. მათ შორის ბლანარი ასახელებს ანტიკორუფციულ ზომებსა და მართლმსაჯულების რეფორმას.