ისრაელში მასშტაბური საპროტესტო აქციები მიმდინარეობს. დილიდან დემონსტრანტებმა ქვეყნის არაერთი გზა გადაკეტეს, მათ შორის მნიშვნელოვანი ჩქაროსნული ტრასა „აიალონი“ თელ-ავივის მახლობლად.
ადგილობრივი მედიის ცნობით, აშშ-ის საელჩოს მოპირდაპირე მხარეს, რომელიც ერთ-ერთი სატრანსპორტო კვანძის მახლობლად მდებარეობს, გააკრეს ბანერი 2023 წლის 7 ოქტომბერს გატაცებული ისრაელელების გამოსახულებებით. თელ-ავივის ჩრდილოეთით მომიტინგეებმა მანქანის საბურავებს ცეცხლი წაუკიდეს. პოლიციაში კი აღნიშნავენ, რომ „გამოხატვისა და პროტესტის თავისუფლება არ ნიშნავს სხვების გადაადგილების თავისუფლებისთვის ზიანის მიყენებას“.
როგორც Times of Israel-ი წერს, მძევლების ახლობლები ადანაშაულებენ მთავრობას იმაში, რომ მათ გატაცებულების სიცოცხლე პოლიტიკურ სარგებელში გაცვალეს.
საღამოსთვის თელ-ავივის ცენტრში მასშტაბური აქციაა დაგეგმილი.