დანიის საგარეო საქმეთა სამინისტროში აშშ-ის ელჩი დაიბარეს გრენლანდიაში გავლენის ოპერაციებთან დაკავშირებული სადაზვერვო ინფორმაციის გამო.
როგორც დანიის საზოგადოებრივი მაუწყებელი თავის წყაროებზე დაყრდნობით წერს, დანიის მთავრობა მიიჩნევს, რომ პრეზიდენტ ტრამპის ადმინისტრაციასთან კავშირების მქონე აშშ-ის, სულ მცირე, სამი მოქალაქე მონაწილეობდა გავლენის ოპერაციებში, რომლებიც მიმართული იყო გრენლანდიის დანიისგან გამოყოფისა და აშშ-თან შეერთების ხელშეწყობისკენ.
„ჩვენ ინფორმირებული ვართ, რომ უცხოელი აქტორები კვლავ ავლენენ ინტერესს გრენლანდიის და დანიის სამეფოში მისი პოზიციის მიმართ. ამიტომ, გასაკვირი არ არის, თუ ჩვენ აღმოვჩნდებით სამეფოს მომავალზე გარე გავლენის მცდელობების წინაშე“, – ნათქვამია დანიის საგარეო საქმეთა მინისტრის, ლარს ლოკე რასმუსენის განცხადებაში.
ცნობისთვის, არჩევნებში გამარჯვების შემდეგ აშშ-ის პრეზიდენტმა, დონალდ ტრამპმა არაერთხელ განაცხადა, რომ მას სურს აშშ-ის კონტროლი მინერალებით მდიდარ და სტრატეგიული მდებარეობის მქონე არქტიკულ კუნძულზე ეროვნული და საერთაშორისო უსაფრთხოების მიზეზებით. გრენლანდია დანიის შემადგენლობაში შემავალი ნახევრადავტონომიური ტერიტორიაა.