ამერიკა-ჩინეთის მოლაპარაკებებში გარკვეული პროგრესი მიღწეულია, – ამის შესახებ აშშ-ის სახაზინო მდივანმა, სკოტ ბესენტმა განაცხადა.
„შეთანხმების ტექნიკურ დეტალებთან დაკავშირებით ძალიან კარგ პროგრესს მივაღწიეთ. რაც შეეხება თავად შეთანხმებას, ჩვენი ჩინელი კოლეგები საკმაოდ აგრესიული მოთხოვნებით გამოვიდნენ. ვნახოთ, შევძლებთ თუ არა შეთანხმების მიღწევას. ამჟამად ჩვენ მზად არ ვართ, სოციალური მედიის აპლიკაციისთვის ჩვენი ეროვნული უსაფრთხოება შევწიროთ“, – აღნიშნა ბესენტმა.
აშშ-ის ხაზინის მდივნის განცხადებით, ამერიკა და ჩინეთი გარიგების დადებასთან ახლოს არიან, თუმცა ბესენტი აღნიშნავს, რომ „ტიკტოკის“ საკითხზე ორ ქვეყანას შორის შეთანხმება თუ ვერ მიიღწევა, ეს ამერიკა-ჩინეთს შორის ურთიერთობებზე გავლენას არ მოახდენს.
ცნობისთვის, მადრიდში მოლაპარაკებები გრძელდება. ამერიკისა და ჩინეთის დელეგაციები სავაჭრო საკითხებს, ეროვნულ უსაფრთხოებას და ვიდეოაპლიკაცია „ტიკტოკის“ საკუთრების საკითხებს განიხილავენ. აშშ-ის პრეზიდენტი, დონალდ ტრამპი აცხადებს, რომ აპლიკაცია „ტიკტოკის“ ბედი ჩინეთის გადაწყვეტილებაზეა დამოკიდებული.