ბევრი ევროპული ქვეყანა როდესაც ეკონომიკური კრიზისის წინაშე დგას და აქვთ გამოწვევები ეკონომიკის მხრივ, საქართველოს ეკონომიკა იზრდება, რადგან არ დავუჯერეთ ბრიუსელს, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.
პაპუაშვილის თქმით, საქართველოს ბრიუსელისთვის რომ დაეჯერებინა, დღეს საქართველო ეკონომიკურ კოლაფსში იქნებოდა.
„ეკონომიკური კრიზისის წინაშე როდესაც დგას ბევრი ევროპული ქვეყანა და გამოწვევები აქვთ ეკონომიკის მხრივ, საქართველოს ეკონომიკა იზრდება. რატომ ხდება ეს?! იმიტომ, რომ არ დავუჯერეთ ყველაფერში ბრიუსელს. ჩვენ რომ ბრიუსელისთვის დაგვეჯერებინა, დღეს საქართველო იქნებოდა ეკონომიკურ კოლაფსში. ჩვენ რომ დაგვეწესებინა სანქციები, ჩაგვეკეტა საზღვრები და ა.შ, საქართველოში 10 პროცენტზე მეტი ეკონომიკური ვარდნა გვექნებოდა. იმაზე მეტი, ვიდრე იყო პანდემიის დროს და საერთო ჯამში, ჩვენ 90-იანი წლების შედეგი გვექნებოდა. ამისკენ გვიბიძგებდა ბრიუსელიდან წამოსული ე.წ. რჩევები, რომელიც სინამდვილეში იყო უბრალოდ მცდელობა, საქართველოს ხარჯზე მომხდარიყო რუსეთთან რაღაც გეოპოლიტიკური მიზნების მიღწევა. ასე ცივსისხლიანად, ჩვენი მოქალაქეების ინტერესების უგულვებელყოფით გვაგდებდნენ ეკონომიკური კრიზისის უფსკრულში და დიდი ალბათობით გვაგდებდნენ ახალ ომში, მაშინ, როდესაც ბრიუსელი მოგვიწოდებდა რუსეთთან ესკალაციისკენ.
ეს ეკონომიკური შედეგები არის იმის შედეგი, რომ არ დავუჯერეთ ბრიუსელს და უფრო მეტიც იქნებოდა, რომ არა ბრიუსელიდან მომდინარე მავნე დაფინანსება იმ რევოლუციური პროცესებისა, რომელიც ახლა უკვე ირკვევა პროკურატურაში მიმდინარე გამოძიებით. პირდაპირ ჩანს, რომ ევროკავშირის ფული იხარჯებოდა ძალადობრივი აქციის მონაწილეების აღჭურვაში, რათა მათ წინააღმდეგობა გაეწიათ პოლიციისთვის. შეგახსენებთ, ყველა ამ ჩვენებიდან დადასტურდა, რომ ეს „ენჯეოები“, რომლებიც ევროკავშირისგან ფინანსდებიან, ძალადობრივი აქციის მონაწილეებს ურიგებდნენ პოლციიისთვის წინააღმდეგობის გასაწევ აღჭურვილობას. ეს ყველაფერი ხდებოდა ევროკავშირის ფულით და კეთილი ინებოს ევროკავშირის ელჩმა, აღირსოს ქართველ ხალხს პასუხი ამასთან დაკავშირებით – აპირებს თუ არა, მოიკვლიოს, მისი ფული რა ოდენობით იხარჯებოდა, აპირებს თუ არა ამაზე პასუხისმგებლობის აღებას, რომ 2024 წლის დეკემბერში ძალადობრივი აქციის მონაწილეთა აღჭურვაში იხარჯებოდა ევროკავშირის მოქალაქეების ფული.“, – განაცხადა შალვა პაპუაშვილმა.