საქართველოს პრემიერ-მინისტრი ირაკლი კობახიძე კულტურის, განათლების, სპორტისა და ახალგაზრდობის პოლიტიკის მიმართულებით დედაქალაქის მერის პრეზენტაციას დაესწრო.
კახა კალაძემ იმ პროექტებსა და პროგრამებზე ისაუბრა, რომლებსაც თბილისის მერია ამ მიმართულებით მომდევნო წლებში განახორციელებს.
დედაქალაქის მერის თქმით, საგანმანათლებლო და ახალგაზრდული პროექტების მხარდაჭერა პრიორიტეტად დარჩება, დაფინანსდება 500-ზე მეტი პროექტი, გაგრძელდება ახალგაზრდული ცენტრების მშენებლობა და რეაბილიტაცია.
როგორც კახა კალაძემ აღნიშნა, ასევე, განსაკუთრებული პრიორიტეტი იქნება სპორტის მხარდაჭერა, მათ შორის – არსებული სპორტული კომპლექსების რეაბილიტაცია და ახალი ინფრასტრუქტურის მშენებლობა.
დედაქალაქის მერია მნიშვნელოვან ყურადღებას დაუთმობს კულტურის სფეროს ხელშეწყობას. დაფინანსდება 1 000-ზე მეტი კულტურული პროექტი, განხორციელდება მუზეუმების რეაბილიტაცია.
კულტურის, განათლების, სპორტისა და ახალგაზრდობის პოლიტიკის მიმართულებით დედაქალაქის მერის პრეზენტაციას პრემიერ-მინისტრი პარლამენტის თავმჯდომარე შალვა პაპუაშვილთან, მთავრობისა და პარლამენტის წევრებთან ერთად დაესწრო.
