რუსეთში კრასნოდარის მხარის ოპერატიული შტაბის განცხადებით, 2 ნოემბრის ღამით ქალაქ ტუაფსეს პორტზე დრონებით თავდასხმის შემდეგ ნავთობმზიდ ტანკერზე ხანძარი გაჩნდა და ნავთობტერმინალის ინფრასტრუქტურა და, სულ მცირე, ორი უცხოური ხომალდი დაზიანდა.
რუსული მხარის თანახმად, დრონის ჩამოვარდნილი ნაწილები ორ ნავთობმზიდ ტანკერს დაეცა, რამაც ხანძარი გამოიწვია – ეკიპაჟი კი ევაკუირებულია.
ადგილობრივი ადმინისტრაციის თანახმად, ტუაფსეს მახლობლად დრონის ჩამოვარდნილმა ნაწილებმა რკინიგზის სადგური და საცხოვრებელი სახლები დააზიანა, თუმცა არავინ დაშავებულა.
Telegram-არხები კადრებს ავრცელებს, რომლებშიც ჩანს, რომ ტუაფსეს პორტზე ხანძარია.
ამასთან, რუსეთის თავდაცვის სამინისტრომ გაავრცელა განცხადება, რომლის თანახმადაც 2 ნოემბრის ღამით რუსეთმა კრასნოდარის მხარეში 32 უკრაინული დრონი ჩამოაგდო.
ცნობისთვის, ტუაფსეს პორტი რუსეთისთვის შავ ზღვაში ერთ-ერთი ყველაზე მნიშვნელოვანია. ამ პორტში რუსეთის ერთ-ერთი უმსხვილესი ნავთობკომპანიის, Rosneft-ის ნავთობგადამამუშავებელი ქარხანა და ნავთობბაზა მდებარეობს, რომლებზეც უკრაინას იერიში აქამდე რამდენჯერმე მიუტანია.