სირიის არმია ქალაქ ალეპოს აღმოსავლეთით მდებარე ტერიტორიაზე შევიდა. „ბიბისის“ ცნობით, ეს მას შემდეგ მოხდა, რაც ქურთულმა ძალებმა უკან დახევა დაიწყეს.
სირიის სახელმწიფო საინფორმაციო სააგენტოს ცნობით, სირიის არმიამ დაიწყო შესვლა დასავლეთ ევფრატის ზონაში და დეირ ჰაფერზე სრული სამხედრო კონტროლი დაამყარა. სამხედროებმა მშვიდობიან მოსახლეობას მოუწოდეს, არ შევიდნენ ოპერაციების ზონაში, ვიდრე ტერიტორია სრულად არ იქნება დაცული.
მანამდე, ქურთული ძალების ლიდერი მაზლუმ აბდი დათანხმდა აშშ-ის მიერ მხარდაჭერილი „სირიის დემოკრატიული ძალების” ევფრატის აღმოსავლეთით გადაჯგუფებას, რაც, მისი თქმით, განხორციელდა მეგობარი ქვეყნების და შუამავლების მოწოდებების საპასუხოდ.
ცნობისთვის, ბოლო დღეებში სირიის არმია დეირ ჰაფერის რაიონიდან მშვიდობიან მოსახლეობას ევაკუაციისკენ მოუწოდებდა. სირიის ხელისუფლების მონაცემებით, ტერიტორია სულ მცირე, 4 000-მა ადამიანმა დატოვა. ქურთული ძალების უკან დახევამდე სირიის პრეზიდენტმა აჰმედ ალ-შარაამ განაცხადა, რომ ქურთულ ენას სახელმწიფო ენის სტატუსს მიანიჭებს და ქურთულ ახალ წელს ოფიციალურ დღესასწაულად გამოაცხადებს. ეს 1946 წელს სირიის დამოუკიდებლობის გამოცხადების შემდეგ ქურთების ეროვნული უფლებების პირველი ოფიციალური აღიარებაა. სირიის პრეზიდენტის დადგენილებაში ნათქვამია, რომ ქურთები „სირიის არსებით და განუყოფელ ნაწილი წარმოადგენენ“ და აღნიშნულია, რომ ისინი წინა მმართველების დროს ათწლეულების განმავლობაში განიცდიდნენ ჩაგვრას. ამ გადაწყვეტილებაზე საპასუხოდ, სირიის ჩრდილოეთ და ჩრდილო-აღმოსავლეთ ნაწილში მოქმედმა ქურთულმა ადმინისტრაციამ განაცხადა, რომ ეს „მხოლოდ პირველი ნაბიჯია“ და მოითხოვა ქურთების უფლებების კონსტიტუციაში ასახვა.
ცნობისთვის, 2024 წელს ბაშარ ალ-ასადის მრავალწლიანი მმართველობის დამხობის შემდეგ, პრეზიდენტი ალ-შარაა ცდილობს ქურთული სტრუქტურების ინტეგრირებას სირიის სახელმწიფო ინსტიტუტებში. 2025 წლის მარტში შესაბამის შეთანხმებას მოაწერა ხელი, თუმცა ის კვლავ არ არის განხორციელებული. მხარეები ამაში ერთმანეთს ადანაშაულებენ.