ამდენი წელი გველაპარაკებოდნენ, ნატო-ს კარი ღიაა, ღიაა და უცებ, უკრაინის მაგალითზე ნათლად გამოჩნდა, რომ ეს კარი თურმე ღია არასდროს ყოფილა, – განაცხადა გადაცემაში „EURO ანატომია“ პარლამენტის ვიცე-სპიკერმა, პარტია „ხალხის ძალის“ თავმჯდომარე სოზარ სუბარმა.
სოზარ სუბარის თქმით, ეს ღიად თქვა ინგლისის ყოფილმა პრემიერმა ჯონსონმა, არაერთმა სხვა მაღალი თანამდებობის პირმა დასავლეთიდან.
„რამდენიმე წლის წინ თქვა მიხეილ ყაველაშვილმა, მაშინ არ იყო ჯერ პრეზიდენტი, რომ არც ევროკავშირში, არც ნატო-ში და არც რომელიმე ორგანიზაციაში გაერთიანება არ შეიძლება, იყოს ქვეყნის თვითმიზანი. ამას მოჰყვა წარმოუდგენელი კრიტიკა. ამ დროს თქვა მარტივი ჭეშმარიტება, რომ საქართველოს, ქართველი ხალხის ინტერესი უნდა იყოს ჩვენი სახელმწიფოს უსაფრთხოება, ჩვენი ხალხის კეთილდღეობა, ჩვენი ტერიტორიული მთლიანობის აღდგენა, ჩვენი უკეთესი მომავალი და თვითმიზანი არ შეიძლება, იყოს რაიმე ორგანიზაციაში გაწევრიანება. რაიმე ორგანიზაციაში გაწევრიანება მიზნად უნდა დაისახო მხოლოდ და მხოლოდ იმისთვის, რომ ამ მიზნებს მოემსახუროს, რაც ზემოთ ვთქვი – უსაფრთხოება, ტერიტორიული მთლიანობის აღდგენა, კეთილდღეობა და ა.შ.
დღეს რა გამოდის – რომ, ამდენი წელი გველაპარაკებოდნენ, ნატო-ს კარი ღიაა, ღიაა და უცებ, უკრაინის მაგალითზე ნათლად გამოჩნდა, რომ ეს კარი თურმე ღია არასდროს ყოფილა. ეს ღიად თქვა ინგლისის ყოფილმა პრემიერმა ჯონსონმა, არაერთმა სხვა მაღალი თანამდებობის პირმა დასავლეთიდან. ბაიდენმა თქვა, სხვათა შორის, რომ არც არასდროს ვფიქრობდით უკრაინის მიღებას ნატო-შიო. ეს იყო უბრალოდ სატყუარა, რომლითაც უნდოდათ, რომ უკრაინა გაეწირათ, რუსეთის წინააღმდეგ ომში ჩაეთრიათ, საქართველო გაეწირათ და ა.შ.
გვინდა თუ არა ჩვენ ნატო? გვინდა თუ არა ჩვენ ევროკავშირი? ყველაფერი გვინდა, რაც ჩვენი ქვეყნის უსაფრთხოებისთვის იქნება კარგი, მაგრამ თუკი გვეუბნებიან, ნატო-ში ვერ მიგიღებთ, მაგრამ შენ მაინც იყვირე ნატო-ში მინდა, რომ შენი დიდი მეზობელი გააღიზიანო, რა თქმა უნდა, ასეთი პოლიტიკა ჩვენთვის ვერ იქნება საგარეო პოლიტიკის განმსაზღვრელი. ამიტომ, ჩვენ უნდა დავიცვათ ჩვენი უსაფრთხოება, მაქსიმალურად ვცადოთ მრავალვექტორული პოლიტიკის განვითარება იმიტომ, რომ ჩინეთთან ურთიერთობა, ევროპასთან ურთიერთობა, ამერიკის შეერთებულ შტატებთან, გლობალურ სამხრეთს რასაც უწოდებენ, არაბულ ქვეყნებთან, თურქეთთან ურთიერთობა, ჩვენს სამეზობლოსთან – აზერბაიჯანთან, სომხეთთან ურთიერთობა, ქმნის საფუძველს ჩვენი ეკონომიკის განვითარებისთვის და ჩვენი უსაფრთხოებისთვის.
პარალელურად, რაც ხელისუფლების მიერ არის ნათქვამი, რომ 2030 წლისთვის საქართველო მზად იქნება ევროკავშირში გაწევრიანებისთვის, ბუნებრივია, ჩვენ ამ გზით ისედაც მივდივართ და ვიქნებით მზად, თუკი ევროკავშირი იმ დროისთვის იარსებებს“, – აღნიშნა სოზარ სუბარმა.