“აიათოლა ალი ხამენეიმ უნდა შეწყვიტოს ადამიანების მკვლელობა, მისი ქვეყანა ცუდი ხელმძღვანელობის გამო ყველაზე საშინელი ადგილია მსოფლიოში, ეს კაცი ავადმყოფია”

აშშ-ის პრეზიდენტმა ირანის სულიერი ლიდერი ავადმყოფად მოიხსენია. ამის შესახებ დონალდ ტრამპმა „პოლიტიკოსთან“ საუბრისას განაცხადა. ტრამპმა ირანში არსებულ ვითარებაზე ისაუბრა და აღნიშნა, რომ მისი ინფორმაციით, ირანში მკვლელობები შეწყდა.

„საუკეთესო გადაწყვეტილება, რაც მან ოდესმე მიიღო, იყო ორი დღის წინ, 800-ზე მეტი ადამიანის ჩამოხრჩობის თავიდან აცილება“, – თქვა ტრამპმა ირანში აშშ-ის შესაძლო ოპერაციაზე საუბრისას.

ჟურნალისტმა შეერთებული შტატების ლიდერს ასევე აჩვენეს აიათოლა ალი ხამენეის პოსტები, სადაც ირანის სულიერი ლიდერი აღნიშნავს, რომ აშშ-ის პრეზიდენტი დამნაშავეა ირანელი ერისთვის მიყენებული მსხვერპლის, ზიანისა და ცილისწამებისთვის.

„ეს კაცი ავადმყოფია. მან სათანადოდ უნდა მართოს თავისი ქვეყანა და შეწყვიტოს ადამიანების მკვლელობა. მისი ქვეყანა ცუდი ხელმძღვანელობის გამო ყველაზე საშინელი ადგილია საცხოვრებლად მთელ მსოფლიოში. როგორც ქვეყნის ლიდერი, ის დამნაშავეა ქვეყნის სრულ განადგურებაში და ძალადობის გამოყენებაში ისეთ დონეზე, როგორიც აქამდე არავის უნახავს. იმისათვის, რომ ქვეყანამ ფუნქციონირება შეინარჩუნოს, მიუხედავად იმისა, რომ ეს ფუნქცია ძალიან დაბალი დონისაა, ხელისუფლებამ ყურადღება უნდა გაამახვილოს თავისი ქვეყნის სათანადო მართვაზე, როგორც მე ვაკეთებ შეერთებულ შტატებში და არა ათასობით ადამიანის მოკვლაზე, რომ კონტროლი შეინარჩუნოს. ლიდერობა პატივისცემაზეა დაფუძნებული, და არა შიშსა და სიკვდილზე“, – აღნიშნა ტრამპმა.

ცნობისთვის, აიათოლა ალი ხამენეიმ განაცხადა: „ჩვენ აშშ-ის პრეზიდენტს დამნაშავედ ვცნობთ ირანელი ერისთვის მიყენებული მსხვერპლის, ზიანისა და ცილისწამებისთვის, ამერიკული ამბოხის მიზანია, გადაყლაპოს ირანი“.