სლოვაკეთის პრემიერ-მინისტრს, რობერტ ფიცოს მიაჩნია, რომ ევროკავშირი „ღრმა კრიზისიდან“ თავს მხოლოდ ახალი ხელმძღვანელობის პირობებში დააღწევს. მან ამჟამინდელი ლიდერები დაადანაშაულა იმაში, რომ მათ არ აქვთ პასუხები კავშირის წინაშე არსებულ საკვანძო კითხვებზე.
„ევროკავშირზე იგივე წესი ვრცელდება, რაც მასაჟის სალონზე: თუ ის არ მუშაობს, საკმარისი არ არის საწოლების გამოცვლა, პერსონალი უნდა შეცვალოთ“, – აღნიშნა მან.
ფიცომ ბრიუსელში დაგეგმილი რიგგარეშე სამიტის წინ ვიდეო გამოაქვეყნა, რომელშიც ევროკავშირის ხელმძღვანელობა მკაცრად გააკრიტიკა. მან აღნიშნა, რომ სამიტი „ცუდად მომზადებულია“ და ის მხოლოდ „ცალკეული წევრი ქვეყნების პანიკაზე“ რეაქციას წარმოადგენს.
ევროკავშირსა და აშშ-ს შორის ურთიერთობებში არსებულ აქტუალურ კრიზისზე საუბრისას, ფიცომ განაცხადა, რომ პრობლემა სწორედ კავშირის ხელმძღვანელობაშია.
„ჩვენ არ შეიძლება ევროკავშირის ხელმძღვანელ პოზიციებზე გვყავდეს ადამიანები, რომლებსაც საკვანძო გლობალური აქტორები არ ხვდებიან და პრაქტიკულად საერთოდ არ ელაპარაკებიან. თუ ამერიკის სახელმწიფო მდივანი, მარკო რუბიო ჯიუტად უარს ამბობს კაია კალასთან შეხვედრაზე, რომ აღარაფერი ვთქვათ მასთან კონსტრუქციულ საუბარზე, მაშინ საერთოდ რა საჭიროა მისი ფუნქცია?“ – განაცხადა სლოვაკეთის მთავრობის მეთაურმა.
მან ასევე აღნიშნა, რომ „ერთადერთი რამ, რაც დღეს ევროკავშირს მართავს, არის რუსეთის მიმართ სიძულვილი“.