აშშ-ის ხაზინის მდივანმა, სკოტ ბესენტმა კანადის ალბერტას პროვინციაში დამოუკიდებლობის რეფერენდუმის პერსპექტივაზე მიანიშნა, მაშინ როდესაც პრეზიდენტი დონალდ ტრამპი და კანადის პრემიერ-მინისტრი, მარკ კარნი დასავლეთ ნახევარსფეროში ოტავას როლის გარშემო დაპირისპირებაში არიან ჩართულნი. ინფორმაციას ამის შესახებ გამოცემა POLITICO ავრცელებს.
„ალბერტა აშშ-ის ბუნებრივი პარტნიორია“, – განაცხადა მან ხუთშაბათს, კონსერვატორ პოდკასტერ ჯეკ პოსობეცთან ინტერვიუში. „მათ აქვთ უზარმაზარი რესურსები. ალბერტელები ძალიან დამოუკიდებელი ხალხია. დადის ხმები, რომ მათ შესაძლოა ჩაატარონ რეფერენდუმი იმის შესახებ, სურთ თუ არა კანადის შემადგენლობაში დარჩენა“.
„ალბერტული სეპარატიზმის აჩრდილი კანადისთვის რეალურია. მთელი პროვინციის მასშტაბით ორგანიზატორებს მხოლოდ 178 000 ხელმოწერის შეგროვება სჭირდებათ 2 მაისამდე, რათა დამოუკიდებლობის შესახებ რეფერენდუმის ჩატარება აიძულონ. წარმატების შემთხვევაში, კანადის მთავრობას მოუწევს მოლაპარაკებების წარმოება შესაძლო გამოყოფის თაობაზე“, – წერს გამოცემა POLITICO.
„ხალხი ლაპარაკობს“, – განაცხადა ბესენტმა. „ხალხს სუვერენიტეტი სურს. მათ უნდათ ის, რაც აშშ-ს აქვს“.