ირანი აშშ-ს აფრთხილებს. Reuters-ს ისლამური რესპუბლიკის მაღალჩინოსანმა უთხრა, რომ ქვეყანა ნებისმიერ თავდასხმას სრულმასშტაბიან ომად აღითქვამს.
თეირანის ცენტრალურ მოედანზე ქვეყნის ხელისუფლებამ გიგანტური ბილბორდი გამოფინა. მასზე გამოსახულია დაზიანებული ამერიკული ავიამზიდი, რომლის გემბანიც მოფენილია გვამებით, სისხლის კვალი კი ამერიკის შეერთებული შტატების დროშის კონტურებს იმეორებს. არის სლოგანიც: “ვინც ქარს თესავს, ის ქარიშხალს მოიმკის.”
მედია წერს, რომ ბილბორდი მას შემდეგ გამოჩნდა, რაც ამერიკული ფლოტი, მათ შორის ავიამზიდი “აბრაამ ლინკოლნი”, ახლო აღმოსავლეთში გადაისროლეს.
ტრამპი სამხედრო მოქმედებით იმუქრება, თუ ირანი მშვიდობიანი მომიტინგეების მკვლელობას გააგრძელებს ან დაკავებულებს სიკვდილით დასჯის. ბოლო ერთი თვის განმავლობაში ანტისამთავრობო დემონსტრაციების დროს ქვეყნის მასშტაბით ასობით ადამიანი მოკლეს, დაკავებულია 41 000.