ზოგჯერ მაგალითად ზედმეტ დანახარჯს განაპირობებს ზედმეტად დანიშნული მედიკამენტი. ამ დრომდეც ხდებოდა ამაზე ყურადღების გამახვილება, მაგრამ ნამდვილად არ აწყენდა ქართულ ჯანდაცვის სისტემას, თუკი უფრო მეტად იქნება ყურადღება კონცენტრირებული ამ საკითხებზე, – განაცხადა გადაცემაში „იმედი LIVE“ ჯანდაცვის მინისტრმა მიხეილ სარჯველაძემ.
„საბითუმო ვაჭრობა ძალიან მნიშვნელოვნად დასარეგულირებელია, ამ მიმართულებით მნიშვნელოვანია კარგად გვესმოდეს, რომ დეფიციტები არ უნდა შეიქმნას, არ უნდა მოხდეს ერთი და იგივე კატეგორიის მედიკამენტის ფარგლებში, ვაჭრობის წახალისების მიზნით სხვადასხვა დასახელების რომელიმე მედიკამენტზე ხელოვნურად დეფიციტების შექმნა და ასე შემდეგ“, – აღნიშნა მან.
კითხვაზე – „ბიზნესი, ასევე ხელისუფლების ოპონენტები ამბობენ, რომ თუკი ბიზნესს შეუმცირდება შემოსავლები რეგულაციების გაზრდის ხარჯზე, შეიძლება მან დაიზღვიოს თავი და არ შექმნას დამატებითი მარაგები. არსებობს რისკი, რომ რეგულაციებმა დეფიციტი შექმნას?“ – სარჯველაძემ ასე უპასუხა:
„ბიზნესში დღეს არიან საკმარისად კეთილსინდისიერი ადამიანები და ადამიანები რომლებიც სოციალურ პასუხისმგებლობითაც აღვსილები არიან. მხოლოდ იმიტომ, რომ რაღაცა გამოსავალი იპოვონ და რომელიმე ისეთ მედიკამენტზე აქცენტი გადაიტანონ, რომელზედაც რეფერენტული ფასი არ ვრცელდება მაშინ, ჩვენც გვაქვს ინსტრუმენტი, რომ იმავე მედიკამენტზე შევქმნათ რეფერენტული ფასი. ეს მე მგონი ცოტა სკეპტიკურ განწყობის დემონსტრირებაა და მეტი არაფერი“.
მინისტრმა ასევე უპასუხა კითხვას: „ხელისუფლება საუბრობს იმაზეც, რომ შესაძლოა იყოს ერთგვარი მონოპოლია – ამას როგორ დაარეგულირებს მთავრობა?“.
სარჯველაძის განმარტებით, ეს ყველაფერი რეგულირებადია – ამგვარი ინციდენტები აქამდეც იყო, თუმცა ამას მასშტაბური სახე არ მიუღია.
„სამწუხაროდ ასეთ კარტელური გარიგებების პრაქტიკას შეიძლება ადგილი ჰქონდეს, მაგრამ ჩვენთვის მთავარია დავაზღვიოთ მომხმარებელი იმით, რომ რაღაცაზე მეტი არცერთ შემთხვევაში არ იყოს ფასი და ამასაც ადმინისტრირება სჭირდება; ამის წინააღმდეგ საბრძოლო ინსტრუმენტები ზოგადად არსებობს, მათ შორის შესაძლებელია ეს იყოს მაგალითად ადმინისტრირების მკაცრი მექანიზმები; მაგალითად, ხელოვნურად დეფიციტის შექმნის შემთხვევაში, ისეთ მედიკამენტზე რომელიც მნიშვნელოვანია, რომ აუცილებლად იყოს თაროზე, შეიძლება სტანდარტულად, ვალდებულების სახით ჩამოყალიბდეს და ეს ასეც უნდა იყოს. ესენციურ მედიკამენტებს ეძახიან, მნიშვნელოვანი მედიკამენტების ჩამონათვალი ყოველთვის უნდა იყოს დახლზე. სამწუხაროდ ფსიქოტროპულ მედიკამენტებზე ფასების გაიაფების შემდეგ, ზოგიერთ შემთხვევაში წავაწყდით იმას, რომ რეალურად მარაგი ჰქონდათ, და გარკვეულ მიზეზთა გამო, შესაძლოა ადგილზე მისულ ბენეფიციართათვის ეთქვათ, რომ დეფიციტია მარაგი არ აქვთ. ასეთი რაღაცები ხდება, ამას სჭირდება ბრძოლა და რეალურად ეს რეგულირებადია. ხარისხობრივი რეგულირებაც აუცილებელია, ფასები კლებამ არ უნდა გამოიწვიოს უხარისხო პროდუქტის გაჩენა“, – განაცხადა სარჯველაძემ.