ლატვიის პარლამენტმა პლენარულ სხდომაზე უნდობლობა ვერ გამოუცხადა ქვეყნის პრემიერ-მინისტრს, ევიკა სილინას. ინფორმაციას ადგილობრივი მედია ავრცელებს.
მთავრობის ნდობის საკითხის კენჭისყრაზე დაყენების ინიციატორი ოპოზიციური პარტია „ლატვია უპირველეს ყოვლისა“ იყო. აღნიშნული საკითხი ჯერ კიდევ 5 თებერვალს უნდა განეხილათ, თუმცა კვორუმის არ არსებობის გამო კენჭისყრა გადაიდო.
თანამდებობიდან პრემიერის გათავისუფლებას მხარი 39 დეპუტატმა დაუჭირა, ხოლო 48 წინააღმდეგი იყო. პარლამენტის კიდევ ერთმა წევრმა თავი შეიკავა.
როგორც მედია იუწყება, დეპუტატებმა ლატვიის პრემიერის გადაყენება მას შემდეგ მოითხოვეს, რაც ცნობილი გახდა, რომ ევროკავშირი ქვეყანას მიგრანტების მიღებას სთხოვს. ოპოზიციონერების თქმით, ლატვიის მთავრობა დამნაშავეა იმაში, რომ ასეთი სცენარის განვითარება თავიდან არ აიცილა.
ცნობისთვის, ლატვიის საგარეო საქმეთა მინისტრმა, ბაიბა ბრაჟემ რამდენიმე დღის წინ განაცხადა, რომ რიგა არ მიიღებს ახალ მიგრანტებს ევროკავშირის მიგრაციის პაქტის ფარგლებში და ასევე უარს იტყვის ევროკავშირის მიერ ამის გამო დაკისრებული ნებისმიერი ჯარიმის გადახდაზე.