უცხოელი აქტორები ვეღარ შეძლებენ თავიანთი ფულის გამოყენებას დიდი ბრიტანეთის არჩევნებში ჩარევის მიზნით, – ნათქვამია დიდი ბრიტანეთის მთავრობის ვებგვერდზე გამოქვეყნებულ განცხადებაში.
ახალი წესები, რომლებიც ასახულია დღეს წარდგენილ „ხალხის წარმომადგენლობის შესახებ“ კანონპროექტში, უზრუნველყოფს მეტ გამჭვირვალობასა და უსაფრთხოებას პოლიტიკური შემოწირულობების გარშემო, რასაც თან ახლავს გაერთიანებული სამეფოს ყველა არჩევნებში ხმის მიცემის უფლების გავრცელება 16 და 17 წლის პირებზე.
„უცხოელი აქტორები ვეღარ შეძლებენ საკუთარი ფინანსების გამოყენებას გაერთიანებული სამეფოს არჩევნებში ჩასარევად. ეს არის დემოკრატიული მონაწილეობის ბოლო თაობის განმავლობაში ყველაზე მასშტაბური გაფართოების ნაწილი, რომელიც ხორციელდება „ხალხის წარმომადგენლობის შესახებ“ კანონპროექტის მეშვეობით – ეს დოკუმენტი პარლამენტს დღეს წარედგინა“, – აღნიშნულია განცხადებაში.
პოლიტიკაში გამჭვირვალობისა და ანგარიშვალდებულების გაზრდის მიზნით, საკანონმდებლო დონეზე მნიშვნელოვანი ცვლილებების დანერგვა იწყება პოლიტიკური ფინანსების რეფორმების ფართო პაკეტის მეშვეობით.
ეს რეფორმები მოიცავს კომპანიების მიერ გაღებული შემოწირულობების გამკაცრებულ წესებს, ახალ სახელმძღვანელო მითითებებს – „იცნობდე შენს დონორს“ და უფრო მკაცრ მოთხოვნებს არარეგისტრირებული გაერთიანებებისთვის.
„ეს ზომები განამტკიცებს მთავრობის „ნულოვანი ტოლერანტობის“ მიდგომას გაერთიანებული სამეფოს დემოკრატიაში უცხოური ჩარევის მიმართ, ვინაიდან მზარდი საერთაშორისო საფრთხეები კიდევ უფრო უსვამს ხაზს ქმედითი ნაბიჯების გადადგმის აუცილებლობას“, – აცხადებენ ბრიტანეთის მთავრობაში.
პოლიტიკური შემოწირულობების განმახორციელებელ კომპანიებს მოეთხოვებათ დაამტკიცონ გაერთიანებულ სამეფოსთან რეალური კავშირი. ეს გულისხმობს იმის დემონსტრირებას, რომ მათი სათავო ოფისი მდებარეობს გაერთიანებულ სამეფოში, მათ უმრავლესობას ფლობენ ან აკონტროლებენ ბრიტანელი ამომრჩევლები ან მოქალაქეები და აქვთ საკმარისი შემოსავალი შემოწირულობის დასაფარად. ეს მიზნად ისახავს უცხოური აქტორების შესაძლებლობის აღკვეთას, გამოიყენონ ფიქტიური კომპანიები ბრიტანულ პოლიტიკაზე გავლენის მოსახდენად.