უკრაინა რუსეთს ტერიტორიებს ბრძოლის გარეშე არ დაუთმობს, – აცხადებს ვოლოდიმირ ზელენსკი. უკრაინის პრეზიდენტი ინტერვიუში Politico-ს უსაფრთხოების გარანტიებზეც ესაუბრა, ბუდაპეშტის მემორანდუმი გაიხსენა და აღნიშნა, რომ ამ გარანტიების პირობით კიევმა ბირთვული არსენალი დათმო, სანაცვლოდ კი არაფერი მიიღო.
„დიდი შეცდომაა, მისცე აგრესორს უფლება, რამე წაგართვას. არავის სურს წლობით ომი – არც მე მინდა და არც ჩვენს ხალხს. ყველა დაიღალა, მაგრამ ჩვენ არ შეგვიძლია, უბრალოდ დავნებდეთ. ჩვენ არ გვინდა მშვიდობა ნებისმიერ ფასად, ჩვენ გვინდა სამართლიანი მშვიდობა.
გვქონდა ბუდაპეშტის მემორანდუმი, რომელიც მხოლოდ უსაფრთხოების გარანტიებს ითვალისწინებდა. ჩვენ გადავეცით ბირთვული იარაღი და სხვა შეიარაღება და სანაცვლოდ მივიღეთ უსაფრთხოების გარანტიები, რომ ჩვენი სუვერენიტეტი დაცული იქნებოდა. საბოლოოდ, უსაფრთხოების გარანტიები არ გვაქვს, რადგან რუსეთი მოვიდა და ჩვენი დამოუკიდებლობა არავინ დაიცვა“, – განაცხადა ზელენსკიმ.