დაღუპულები, დაშავებულები და დაკარგულები – დამანგრეველი წყალდიდობა პერუს სამხრეთ და ცენტრალურ რეგიონებში. განადგურებულია ინფრასტრუქტურა, დანგრეულია სახლები, ჩახერგილია გზები, ათასობით ადამიანი კი ღია ცის ქვეშ, ამ დრომდე სასმელი წყლისა და საკვების გარეშეა დარჩენილი. წყალდიდობისა და მასშტაბური მეწყრის გამო, რამდენიმე პროვინციაში საგანგებო მდგომარეობაა გამოცხადებული. სტიქიის ზონაში მაშველები მუშაობენ, თუმცა დასახლებულ პუნქტებში ევაკუაციის პროცესს ჩახერგილი გზები ართულებს. უსაფრთხოების მაღალი რისკებიდან გამომდინარე პარალიზებულია ტურისტული ობიექტების დიდი ნაწილი.
ქალაქ არეკიპაში სტიქიას უკვე 5 დღეა ებრძვიან. წყალდიდობისა და მეწყრის შედეგად, ორი ადამიანია დაღუპული, დაშავებულია ასობით მოქალაქე, დაზიანებულია ინფრასტრუქტურა – საგანმანათლებლო დაწესებულებები, საცხოვრებელი სახლები, კერძო კომპანიები და მანქანები. ადგილობრივ მოსახლეობას ამ დრომდე არ აქვს წყალი და ელექტროენერგია.
ვითარება ამ დრომდე მძიმეა ლა ლიბერტადის რეგიონშიც. ძლიერი წვიმის შედეგად, ადგილზე ხიდი ჩაინგრა. შემთხვევა იმ დროს მოხდა, როცა მასზე ტვირთით სავსე მანქანა გადადიოდა. ახლა რაიონი გარე სამყაროს მოწყვეტილია.
სტიქია მძვინვარებს ქალაქ პიურაშიც, სადაც მეტეოროლოგიური სამსახური ნალექის მატებას, მდინარეების ადიდებასა და წყალდიდობას პროგნოზირებს. მოსახლეობა, რომელიც სტიქიასთან საბრძოლველად საკუთარი ძალებით ემზადება, ხელისუფლებას დახმარებასა და დროულ რეაგირებას სთხოვს.
ეს პერუში ყველაზე დიდი წყალდიდობაა ბოლო 8 წლის განმავლობაში. ბოლოს, მსგავსი სიმძლავრის სტიქიური მოვლენა 2017 წელს, “ელ-ნინიოს” დროს დაფიქსირდა. მაშინ ასზე მეტი ადამიანი დაიღუპა და დაზიანდა ათიათასობით სახლი, გზა და ხიდი. ეკონომიკურმა ზარალმა კი 3 მილიარდი დოლარი შეადგინა. როგორც ექსპერტები ვარაუდობენ, მიმდინარე სტიქიის ზარალი “ელ-ნინიოს” მაჩვენებლებს გადააჭარბებს.