ჩვენი მტერი ხალხი კი არა, ცუდი უკრაინული პოლიტიკაა, – ამის შესახებ უნგრეთის პრემიერ-მინისტრმა, ვიქტორ ორბანმა განაცხადა.
ორბანის თქმით, ეროვნული ენერგეტიკული უსაფრთხოების საბჭოს სხდომა მოიწვია, რათა განეხილათ „უკრაინის შანტაჟით გამოწვეული სიტუაცია“.
„კერძოდ, უკრაინა ხელს უშლის იაფი რუსული ნედლი ნავთობის უნგრეთში მოხვედრას „დრუჟბის“ მილსადენის მეშვეობით, რითიც უნგრეთისთვის ენერგეტიკული უსაფრთხოების რისკი იქმნება. ჩვენ ავიცილეთ თავიდან ეს საფრთხე და მივიღეთ საჭირო გადაწყვეტილებები. შესაბამისად, დღეს უნგრეთში მიწოდების პრობლემა აღარ არის და ქვეყნის ნორმალური ფუნქციონირება გარანტირებულია. ამავდროულად, ჩვენ გადავწყვიტეთ საპასუხო ზომების მიღება. არ განვაახლებთ დიზელის მიწოდებას უნგრეთიდან უკრაინაში. ჩვენი მტერი არა უკრაინელი ხალხი, არამედ ცუდი უკრაინული პოლიტიკაა“, – განაცხადა ორბანმა.
ამასთან, ორბანმა აღნიშნა, რომ ბუდაპეშტი დაბლოკავს ევროკავშირის მიერ რუსეთის წინააღმდეგ სანქციების მეოცე პაკეტის მიღებას.
„ჩვენ ასევე გადავწყვიტეთ, რომ ვიდრე „დრუჟბის“ მილსადენით ტრანსპორტირება არ აღდგება, ჩვენ არ დავუჭერთ მხარს სანქციების პოლიტიკას, შესაბამისად, უარს ვიტყვით სანქციების მეოცე პაკეტზე. თუ ნავთობის ტრანსპორტირება აღდგება, ნორმალური ურთიერთობები აღდგება“, – განაცხადა ორბანმა.
ცნობისთვის, უკრაინის საგარეო საქმეთა სამინისტროში აცხადებენ, რომ „დრუჟბის“ მილსადენი რუსეთის თავდასხმების შედეგად დაზიანდა, რის გამოც ვერ ხერხდება უნგრეთისა და სლოვაკეთისთვის ნავთობის მიწოდება და უკრაინის მთავრობამ მათ ამის შესახებ აცნობა.