ევროკომისიაში გამოთქვეს შეშფოთება იმ ფაქტის გამო, რომ ევროკავშირში უკრაინის გასაწევრიანებლად საჭირო რეფორმების ტემპი შეიძლება შენელდეს.
ამის შესახებ უკრაინულ მედიასთან ინტერვიუში გაფართოების საკითხებში ევროკომისარმა, მარტა კოსმა განაცხადა.
ინტერვიუს მსვლელობისას კოსმა აღნიშნა, რომ აქამდე უკრაინა ევროკავშირის წევრობისკენ მიმავალ გზაზე „საკმარისად სწრაფი“ იყო.
„მაგრამ მე მაშფოთებს ის, რომ ახლა რადაში არსებული სიტუაციის გამო ყველაფერი შეიძლება შენელდეს. დაუშვებელია, რომ ეს მოხდეს“, – აღნიშნა მან.
ევროკომისარმა აღნიშნა, რომ ხშირად მართავს შეხვედრებს უმაღლესი რადის წარმომადგენლებთან, რომელთა დროსაც აგზავნის „მკაფიო სიგნალს“: „უკრაინის ევროკავშირში გაწევრიანება და თქვენი მომავალი წევრობა არ არის მხოლოდ მთავრობის ამოცანა. ეს არის მთელი უკრაინელი ხალხის პროექტი“.
მისი თქმით, თუ გარკვეული რეფორმების გატარება რამდენიმე თვით დაგვიანდება, ამაში ტრაგედია არ იქნება.
„მაგრამ თუ შეფერხებები უფრო და უფრო გახანგრძლივდება – მაშინ ჩვენ მოგვიწევს რეაგირება“, – დასძინა კოსმა.