საქართველოს თავდაცვის სამინისტროს „არმიჰოლში“ სამხედრო გაწვევისა და რეკრუტირების ეროვნული სააგენტოს დაარსების დღისადმი მიძღვნილი საზეიმო ცერემონია გაიმართა.
სამინისტროს ინფორმაციით, სააგენტოს თანამშრომლებს სიტყვით მიმართა თავდაცვის მინისტრის მოადგილემ, გრიგოლ გიორგაძემ. მისი განცხადებით, რეფორმის ფარგლებში სააგენტომ საფუძველი ჩაუყარა სახელმწიფოს ინტერესებზე მორგებულ ეფექტიან სისტემას და შეცვალა წლების განმავლობაში მოქმედი გაწვევის მოძველებული მოდელი.
მინისტრის მოადგილემ წვევამდელთა ეროვნულ სამხედრო სამსახურში ნებაყოფლობით ჩარიცხვის მსურველთა მზარდი რაოდენობა ხაზგასმით აღნიშნა. გრიგოლ გიორგაძის განცხადებით, წვევამდელთა ეროვნული სამხედრო სამსახური მაღალი მზადყოფნის მქონე რეზერვის მყარ საფუძველს ქმნის. მან სააგენტოს თანამშრომლებს გაწეული სამსახურისთვის მადლობა გადაუხადა და აღნიშნა, რომ რეზერვის სისტემის განვითარებისთვის მუშაობა მომავალშიც გაგრძელდება.
პირად შემადგენლობას სიტყვით მიმართა თავდაცვის ძალების მეთაურის მოადგილემ, გენერალ-მაიორმა, ირაკლი ჭიჭინაძემ. მისი განცხადებით, სააგენტომ თავდაცვის ძალების გაძლიერებისა და სისტემური განვითარების გზაზე მნიშვნელოვან შედეგებს მიაღწია.
ღონისძიებაზე სააგენტოს საქმიანობის ანგარიშით წარსდგა სამხედრო გაწვევისა და რეკრუტირების ეროვნული სააგენტოს დირექტორი, პოლკოვნიკი ირაკლი ჭითანავა. მან 2024 წლიდან სააგენტოს მიერ წვევამდელთა ეროვნული სამხედრო სამსახურის მოდერნიზებისა და პროცესების გამჭვირვალობისათვის განხორციელებული რეფორმების შესახებ ისაუბრა.
საზეიმო ცერემონიაზე სამხედრო მოსამსახურეები უწყებრივი მედლებით – „სამშობლოსათვის თავდადებული“ და ფასიანი საჩუქრებით დაჯილდოვდნენ.
სააგენტოს დაარსების დღისადმი მიძღვნილ ღონისძიებას თავდაცვის მინისტრისა და თავდაცვის ძალების მეთაურის მოადგილეები, ასევე თავდაცვის ძალების სარდლობების სარდლები და სხვა ოფიციალური პირები დაესწრნენ.
სამხედრო გაწვევისა და რეკრუტირების ეროვნული სააგენტო „თავდაცვის კოდექსის“ საფუძველზე 2024 წელს დაარსდა.