თბილისის საკრებულოს თავმჯდომარე ზურაბ აბაშიძე სტრასბურგში, ევროპის საბჭოს ადგილობრივ და რეგიონულ ხელისუფლებათა კონგრესის 50-ე პლენარულ სესიაზე სიტყვით გამოვიდა.
ზურაბ აბაშიძემ მიმართვა დაიწყო ევროპის საბჭოსადმი მადლიერების გამოხატვით, რომ ევროპის საბჭომ გაიზიარა ქართველი ხალხის გლოვა სრულიად საქართველოს კათოლიკოს-პატრიარქის, ილია მეორის გარდაცვალების გამო.
„მინდა, გამოვხატო გულწრფელი მადლიერება ევროპის საბჭოს მიმართ, რადგან გაიზიარა ქართველი ხალხის გლოვა საქართველოს კათოლიკოს-პატრიარქის, ილია მეორის გარდაცვალების გამო — ადამიანის, რომელსაც ქართული საზოგადოებისთვის ისტორიული და განსაკუთრებული მნიშვნელობა ჰქონდა. ჩვენ ღრმად ვაფასებთ ევროპის საბჭოს გადაწყვეტილებას, დაეშვა დროშა გლოვის ნიშნად. ეს ჟესტი ჩვენთვის დიდი მნიშვნელობისაა“, – აღნიშნა ზურაბ აბაშიძემ.
სესიაზე წარადგინეს მოხსენება საქართველოში 2025 წლის 24-25 სექტემბერს განხორციელებული ფაქტების დამდგენი მისიის ანგარიშის შესახებ.
ზურაბ აბაშიძის თქმით, წინასწარი რეზოლუციის პროექტი ხაზს უსვამს ღია დიალოგის წარმართვის მნიშვნელობას.
„ჩვენ მუდმივად ვსაუბრობდით ჯანსაღი და ორმხრივად კონსტრუქციული დისკუსიების მნიშვნელობაზე და კვლავ ვადასტურებთ ვალდებულებას ამ მიმართულებით. სამოქალაქო საზოგადოებასა და ოპოზიციურ პარტიებთან ბოლო პერიოდში გაძლიერებული დიალოგი დადებით ნაბიჯად უნდა შეფასდეს. ჩვენ ვხედავთ, რომ მნიშვნელოვან საკითხებზე ღია დებატები მედიასაშუალებებით პირდაპირ ეთერში მიმდინარეობს. აღსანიშნავია, რომ მმართველმა გუნდმა აჩვენა მზაობა, გაითვალისწინოს მოწინააღმდეგე მხარის არგუმენტები. გვჯერა, ეს მნიშვნელოვანი პროცესი გაგრძელდება და კიდევ უფრო გაფართოვდება, რაც უზრუნველყოფს ჩვენი საზოგადოებისთვის მნიშვნელოვანი საკითხების გადაწყვეტას კოორდინირებული, კარგად გააზრებული პოზიციებიდან. ჩვენ ვიზიარებთ მოსაზრებას, რომ დიალოგი საზოგადოების დეპოლარიზაციისკენ მიმავალი სწორი გზაა“, – განაცხადა ზურაბ აბაშიძემ.
ამასთან, ზურაბ აბაშიძის განმარტებით, არსებობდა მოლოდინი, რომ ევროპის საბჭოს ადგილობრივ და რეგიონულ ხელისუფლებათა კონგრესის ანგარიში ერთი წინადადებით მაინც დაგმობდა 4 ოქტომბრის ძალადობას.
„გარდა ამისა, მინდა, ვუპასუხო 2025 წლის 4 ოქტომბრის ადგილობრივი არჩევნების შესახებ გაკეთებულ განცხადებას. არჩევნების შედეგად საქართველოს მოქალაქეებმა აირჩიეს მუნიციპალური საბჭოების წევრები და 64 მუნიციპალიტეტში 64 მერი. აკრედიტებულმა საერთაშორისო დამკვირვებლებმა ხაზი გაუსვეს საარჩევნო პროცესის ორგანიზაციის მაღალ სტანდარტებს, თანამედროვე ტექნოლოგიების ეფექტურ გამოყენებას, ხმის ფარულობის დაცვასა და პროცედურების გამჭვირვალობას. მათი შეფასება ადასტურებს, რომ კენჭისყრა მშვიდად, შეუფერხებლად და დემოკრატიული სტანდარტების სრული დაცვით წარიმართა. ჩვენ ველოდებოდით, რომ წარმოდგენილი ანგარიში ერთი წინადადებით მაინც დაგმობდა ძალადობას, რომელიც ვიხილეთ 4 ოქტომბერს, არჩევნების დასრულებისთანავე.
ხელისუფლების ძალადობრივი გზით დამხობას ოპოზიციური პარტიები არჩევნებამდე ერთი თვით ადრე აანონსებდნენ. ჩვენ ველოდებოდით, რომ არ იქნებოდა გამოყენებული ორმაგი სტანდარტი და ამ ძალადობას იმავე სულისკვეთებით დაგმობდით, როგორც ევროპელი პოლიტიკური ლიდერები გმობენ ხოლმე ძალადობას საკუთარ ქვეყნებსა და ტერიტორიებზე. მჯერა, კონგრესს შეუძლია, კონსტრუქციული როლი შეასრულოს საქართველოში პოლიტიკური პოლარიზაციის დაძლევის პროცესის ხელშეწყობაში. დარწმუნებული ვარ, იგი ამას გააკეთებს“, – განაცხადა ზურაბ აბაშიძემ.