თებერვალში ეკონომიკურმა ზრდამ შეადგინა 8.8%, პირველად ჩვენმა ეკონომიკამ გადააჭარბა 100 მლრდ ლარს, რაც მნიშვნელოვანი მაჩვენებელია, ეს არის ერთ-ერთი განმსაზღვრელი ფაქტორი ქვეყნის განვითარებისთვის და მომავალშიც განსაკუთრებული ყურადღება გამახვილდება ეკონომიკის განვითარებაზე, – ამის შესახებ საქართველოს პრემიერ-მინისტრმა ირაკლი კობახიძემ მთავრობის სხდომაზე განაცხადა.
მთავრობის მეთაურმა აღნიშნა, რომ 2021-2025 წლებში საქართველოს ეკონომიკის სხვაობა მოლდოვის ეკონომიკასთან 14 მლრდ დოლარით გაიზარდა, რაც იმას ნიშნავს, რომ ქვეყნების ბიუჯეტებს შორის სხვაობა 3.5 მლრდ დოლარს აღემატება.
პრემიერმა ენერგეტიკული კომპანიებისთვის ჯარიმებისა და საურავების დათქმით ჩამოწერის პროცესზე ისაუბრა და განაცხადა, რომ მთლიანობაში 157 კომპანიას პირობით ეპატია 1 მილიარდი ლარის ჯარიმები.
„კომპანიების ნაწილმა უარი თქვა შეთავაზებით სარგებლობაზე. შედეგად შეწყდება 535 მეგავატის პროექტები, თუმცა გაგრძელდება 1560 მეგავატი პროექტების განხორციელება. ბუნებრივია, საქართველოს მთავრობის ეს გადაწყვეტილება ახალ იმპულსს მისცემს ენერგეტიკის სექტორის განვითარებას“, – განაცხადა ირაკლი კობახიძემ.
პრემიერ-მინისტრმა მთავრობის დღევანდელ სხდომაზე ყურადღება გაამახვილა საქართველოს რკინიგზის 2026-2028 წლის სამოქმედო გეგმაზე, რომლის თანახმად 50 ახალი ლოკომოტივის, 1 500 ახალი ვაგონის შესყიდვა და თანამედროვე სარკინიგზო სისტემების დანერგვა იგეგმება. შედეგად მგზავრთა გადაყვანის წლიური მაჩვენებელი 2 მილიონიდან 5 მილიონამდე გაიზრდება.
მთავრობის გადაწყვეტილებით, განხორციელდება ბორჯომ-ბაკურიანის ისტორიული მატარებლის – ე.წ. „კუკუშკის“ რეაბილიტაცია, რომელიც მგზავრებს 2027 წლის იანვრიდან მოემსახურება. აგრეთვე რკინიგზას დაემატება თბილისი-ქუთაისის და თბილისი-ახალციხის მიმართულებები. აგვისტოში დასრულდება თბილისი-ბათუმის რკინიგზის რეაბილიტაცია, რის შედეგადაც გადაადგილების დრო 5,5 საათიდან 4 საათამდე შემცირდება.
პრემიერ-მინისტრმა სხდომაზე ასევე ისაუბრა „საქართველოს ფოსტაში“ განხორციელებულ ოპტიმიზაციაზე, რის შედეგადაც „საქართველოს ფოსტა“, რომელმაც გასული წელი 7 მილიონი ლარის ზარალით დახურა, პირველად გავა მოგებაზე და გახდება მომგებიანი სახელმწიფო კომპანია.
საქართველოს მთავრობის გადაწყვეტილებით, სააგენტოს „აწარმოე საქართველოში“ ბაზაზე შეიქმნება საქართველოს ეკონომიკის განვითარების კორპორაცია და მასში განხორციელდება რამდენიმე, მათ შორის საქართველოს განვითარების ფონდის ფუნქციის შერწყმა. პრემიერის შეფასებით, შედეგად კერძო სექტორისთვის გაიზრდება ფინანსებზე ხელმისაწვდომობა, კომპანიებს გაეზრდებათ წვდომა იაფ სესხებზე. გარდა ამისა, ეკონომიკის სამინისტროში დამოუკიდებელ უწყებად ჩამოყალიბდება ინვესტიციების სააგენტო, რომელიც აქტიურად იმუშავებს საქართველოში ახალი უცხოური ინვესტიციების მოზიდვაზე.
პრემიერ-მინისტრმა მთავრობის დღევანდელ სხდომაზე ასევე ყურადღება დაუთმო ანაკლიის პორტის ინფრასტრუქტურის განვითარებას. მთავრობის მეთაურის განცხადებით, გადაიხედა ანაკლიის ღრმაწყლოვანი ნავსადგურის დაღრმავებასა და ტალღამტეხის მოწყობასთან დაკავშირებული ხელშეკრულება, რომლის პირვანდელი ღირებულება იყო 203.9 მლნ დოლარი, ასევე – ზედამხედველ კომპანიასთან გაფორმებული ხელშეკრულება, რის შედეგადაც პროექტის ღირებულება 52.5 მლნ დოლარით შემცირდა.
„უახლოეს დღეებში აქტიურად განახლდება სამშენებლო პროცესი ანაკლიაში ბევრად უფრო შემცირებული ხარჯებით. საქართველოს მთავრობა იღებს პასუხისმგებლობას, რომ ყველა ინფრასტრუქტურული პროექტი მაქსიმალურად ხარჯეფექტიანად, მინიმალური საბიუჯეტო დანახარჯებით განხორციელდება,“ – აღნიშნა ირაკლი კობახიძემ.
პრემიერ-მინისტრმა მთავრობის დღევანდელ სხდომაზე ასევე მადლობა გადაუხადა ინფრასტრუქტურის მინისტრს სამინისტროს მიერ მიმდინარე წლის პირველი კვარტლის გეგმის გადაჭარბებით, 107 პროცენტით, შესრულებისთვის.
პრემიერმა სხდომაზე აღნიშნა, რომ ბიზნესის ობიექტური ინტერესებისა და სამომხმარებლო ფასებზე კონკრეტული რეგულაციების შესაძლო გავლენის გათვალისწინებით, მთავრობის გადაწყვეტილებით, პლასტმასის ბოთლებში სასმლის წარმოების იმპორტისა და ბაზარზე განთავსების რეგულაციის ამოქმედება 4 წლით, 2031 წლის პირველ თებერვლამდე გადავადდება.
