სლოვაკეთის პრემიერ-მინისტრი მოსკოვში ვიზიტის ფარგლებში ვლადიმერ პუტინს ვოლოდიმირ ზელენსკის შეტყობინებას გადასცემს, – ამის შესახებ სლოვაკეთის საგარეო და ევროპულ საქმეთა სახელმწიფო მდივანმა, რასტისლავ ხოვანეცმა განაცხადა.
მისი თქმით, რობერტ ფიცომ შესაძლოა, რუსეთის პრეზიდენტისგან „ფასეული ინფორმაცია” მიიღოს იმის შესახებ, როგორ ხედავს ომის დასრულების პერსპექტივებს.
„მიმაჩნია, ამ დროს კონფლიქტში ჩართულ ყველა მხარესთან კომუნიკაცია აუცილებელია. ევროკავშირს და ევროპელ პოლიტიკოსებს კი უნდა ადარდებდეთ, რომ ისინი იმ მოლაპარაკების მაგიდასთან იყვნენ, სადაც სამშვიდობო შეთანხმება დაიდება“, – განაცხადა ხოვანეცმა.
მისივე თქმით, უკვე რამდენიმე დასავლელი ლიდერი ამტკიცებს, რომ ვლადიმერ პუტინთან ამ თემაზე დიალოგი აუცილებელია.
ცნობისთვის, სლოვაკეთის პრემიერ-მინისტრი რობერტ ფიცო მოსკოვს 9 მაისს ეწვევა და ვლადიმერ პუტინს შეხვდება, თუმცა სამხედრო აღლუმზე დასწრებას არ გეგმავს.