პაველ ჰერჩინსკის უსაფუძვლო კრიტიკას საპარლამენტო უმრავლესობაში ეხმაურებიან. ევროკავშირის ელჩმა დღეს თქვა, რომ საქართველო ანტი-ევროპულ რიტორიკას ავრცელებს, რაც ურთიერთობებს აზიანებს.
მმართველი გუნდის წარმომადგენლების განცხადებით, საქართველოს ხელისუფლების რიტორიკა არა ანტიევროპულია, არამედ იმ უსაფუძვლო ბრალდებების პასუხია, რაც ბოლო წლების განმავლობაში – ევრობიუროკრატიის მხრიდან გვესმის.
პარლამენტის ფრაქცია “ქართული ოცნების” თავმჯდომარის პირველი მოადგილის, ლევან მაჭავარიანის განცხადებით, ჰერჩინსკი სიცრუის ტირაჟირებას აგრძელებს.
მისი თქმით, რაც შეეხება ანტიევროპულ რიტორიკას, “ესეც არის ტყუილია”:
“ძალიან სამწუხაროა, რომ ბატონი ჰერჩინსკი აგრძელებს იგივე სიცრუის ტირაჟირებას. ჩვენ ყველას კარგად მოგვეხსენება, რომ ევროინტეგრაციის პროცესი ევროკავშირმა შეაჩერა. ეს ჰერჩინსკის წერილშიც არის ხაზგასმული, რომელიც საგარეო საქმეთა სამინისტროს მისწერა, სადაც პირდაპირ დატანილია თარიღი 2024 წლის ივნისი, როდესაც მათი მხრიდან მოხდა ამ პროცესის შეჩერება. ეს ყველაფერი დაეფუძნა ორ კანონს, რომლის გაწვევაც მოგვთხოვეს. ერთ – ანტი-ლგბტ კანონი, ხოლო მეორე – ქართული გამჭვირვალობის კანონი, სწორედ ეს გახლდათ შეჩერების რეალური მიზეზი.
რაც შეეხება ანტიევროპულ რიტორიკას, რა თქმა უნდა, ესეც არის ტყუილი იქიდან გამომდინარე, რომ ჩვენ ყოველთვის ვართ თავდაცვის რეჟიმში, არანაირ წითელ ხაზებს არ ვკვეთთ და როდესაც ჩვენზე მოდის თავდასხმა, დეზინფორმაციის გავრცელება, ორმაგი სტანდარტით საუბარი, ჩვენ ვალდებულები ვართ, ამ ყველაფერს ვუპასუხოთ, რადგან ჩვენ ვართ თავმოყვარე ერის, თავმოყვარე ხელისუფლება. ამიტომ, უპასუხოდ ვერ დარჩება ვერანაირი ცრუ ბრალდება და ვერანაირი დეზინფორმაცია,“- აცხადებს ლევან მაჭავარიანი.