გერმანული საინფორმაციო სააგენტო DPA-ს ინფორმაციით, ვატიკანი შექმნის სპეციალურ კომისიას, რომელიც ხელოვნური ინტელექტის ტექნოლოგიების განვითარებისა და მისი გავლენების საკითხებზე იმუშავებს.
რომის პაპმა ლეო XIV-მ დაამტკიცა „ხელოვნური ინტელექტის უწყებათაშორისი კომისიის“ შექმნა, რომლის ამოცანაც ხელოვნური ინტელექტის ტექნოლოგიების „ადამიანებზე და მთლიანად კაცობრიობაზე შესაძლო ეფექტების“ ანალიზი იქნება.
წმინდა საყდარი აცხადებს, რომ კომისიის შემადგენლობაში ვატიკანის სხვადასხვა დაწესებულების წარმომადგენლები შევლენ.
ხელოვნური ინტელექტის საკითხი ლეო XIV-ის საჯარო გამოსვლების ერთ-ერთი მთავარი თემაა. ჯერ კიდევ გასული წლის მაისში, როდესაც პონტიფიკოსად ახალი არჩეული იყო, მან ხელოვნური ინტელექტის ტექნოლოგიებსა და ადამიანს შორის დაბალანსებული ურთიერთქმედების აუცილებლობის საკითხი წამოჭრა და საზოგადოება ხელოვნური ინტელექტის განვითარების პოტენციური რისკების შესახებ გააფრთხილა.
ეს თემა, სავარაუდოდ, სათანადო ადგილს დაიკავებს პაპის პირველ დიდ ენციკლიკში (ეპისტოლეში). „ვატიკან ნიუსის“ ცნობით, დოკუმენტი, შესაძლოა, თვის ბოლომდე გამოქვეყნდეს. მედიის ინფორმაციით, ენციკლიკის სამუშაო სახელწოდებაა „დიდებული კაცობრიობა“.
ვატიკანის განცხადებით, ახალ კომისიას დაევალება სხვადასხვა დაწესებულებას შორის თანამშრომლობისა და ინფორმაციის გაცვლის ხელშეწყობა ხელოვნურ ინტელექტთან დაკავშირებულ საკითხებზე, მათ შორის – წმინდა საყდარში მისი გამოყენების პოლიტიკაზე.
პირველი წლის განმავლობაში, კომისიის მუშაობის კოორდინირებას ვატიკანის ერთ-ერთი დაწესებულება უზრუნველყოფს.
https://bntnews.bg/news/vatikanat-sazdava-komisiya-po-izkustveniya-intelekt-1393744news.html