კანონში, რომელიც ჩეხეთში უკრაინელი ლტოლვილების ცხოვრების წესებს შეეხება, ქვეყნის მთავრობამ გარკვეული ცვლილებები შეიტანა. ახალი რეგულაცია, გარკვეულ ასპექტებში, უკრაინელი ლტოლვილების ჩეხეთში ყოფნის პირობებს ამკაცრებს.
ამის შესახებ ჩეხური გამოცემა „ნოვინკი“(Novinky.cz) იუწყება.
„ცვლილება არ შეეხება ჩეხეთში მომუშავე იმ უცხოელებს, რომლებიც კანონს იცავენ. ის, უპირველესად, ფოკუსირებულია სისტემის ბოროტად გამოყენების შემთხვევებზე, უკანონო მიგრაციასა და იმ პირებზე, რომლებიც ჩეხეთის რესპუბლიკის მოქმედ კანონმდებლობას არღვევენ“, – განაცხადა შინაგან საქმეთა მინისტრმა, ლუბომირ მეტნარმა.
ახალი რეგულაციები მოიცავს:
- უკრაინელებმა, რომლებსაც დროებითი დაცვის სტატუსი აქვთ მიღებული, შესაძლოა დაკარგონ ის, თუ შენგენის ზონის ფარგლებს გარეთ 30 დღეზე მეტხანს დარჩებიან;
- ჩეხეთის რესპუბლიკაში დროებითი დაცვის სტატუსი ასევე შეიძლება დაიკარგოს მძიმე დანაშაულის ჩადენის შემთხვევაში;
- ლტოლვილებისთვის განკუთვნილი ჰუმანიტარული დახმარების მიმღებნი ჩეხეთის რესპუბლიკაში უნდა იმყოფებოდნენ, სულ მცირე, 16 დღის მანძილზე მიმდინარე თვის განმავლობაში, თუ ისინი ასეთი დახმარების მიღების უფლებით სარგებლობენ;
- უკრაინული სანომრე ნიშნების მქონე ავტომობილების მძღოლებმა თავიანთი სატრანსპორტო საშუალებები ჩეხეთის საავტომობილო რეესტრში უნდა დაარეგისტრირონ.
„მარტის მონაცემებით, ჩვენს ქვეყანაში 385 040 უკრაინელი ლტოლვილი იმყოფება. მათგან 90 000 დახმარებას იღებს. მხოლოდ ამ წლის დასაწყისიდან დღემდე, ჩვენ გამოვავლინეთ შეღავათების ბოროტად გამოყენების რამდენიმე ასეული შემთხვევა, ხოლო წლის დასაწყისიდან პოლიციამ აღძრა ორმოცზე მეტი სისხლის სამართლის საქმე ისეთ ფაქტებზე, როდესაც ზარალმა 18 მილიონ კრონას გადააჭარბა“, – აღნიშნა ლუბომირ მეტნარმა.
უკრაინის საზოგადოებრივი მაუწყებელი (Suspilne) უკვე იტყობინებოდა, რომ ევროკავშირში უკრაინის მოქალაქეებისთვის დროებითი დაცვის მექანიზმის გახანგრძლივების შესახებ გადაწყვეტილება ჯერ მიღებული არ არის. ევროკავშირის შიგნით ამ საკითხზე დისკუსია გრძელდება.
https://suspilne.media/1315329-cehia-posilila-pravila-perebuvanna-dla-ukrainskih-bizenciv/