პოლონეთმა აშშ-ისგან მიიღო წინასწარი თანხმობა „პეტრიოტის“ სისტემის რაკეტების ადგილზე საწარმოებლად

„ამერიკელები თავიდან სკეპტიკურად უყურებდნენ იმას, შეძლებდნენ თუ არა პოლონელები „პეტრიოტებისთვის“ PAC-3 ტიპის რაკეტების წარმოებას“, – აღნიშნა მან.

„აშშ-ში ჩვენი ვიზიტის შემდეგ, ვფიქრობ, ყველა კარი უკვე ღიაა და სახელმწიფო დეპარტამენტისგან მივიღეთ წინასწარი თანხმობა „პეტრიოტის“ სისტემებისთვის რაკეტების წარმოებაზე. მათ პოლონეთის თავდაცვის კომპლექსში შემავალი საწარმოები დაამზადებენ. საუბარია კონსორციუმის შექმნაზე – ჩვენ პოლონეთში გვაქვს ამის შესაძლებლობა“.

თავდაცვის ინდუსტრიის პორტალ Defence24-ის ცნობით, ვაშინგტონი დიდი ხნის განმავლობაში არიდებდა თავს მსგავსი უნიკალური საწარმოო სიმძლავრეების სხვებისთვის გაზიარებას, თუმცა შეცვლილმა გარემოებებმა მისი გეგმები შეცვალა. ამჟამად მსოფლიოში წლიურად PAC-3 MSE-ის (რაკეტის უახლესი ვერსია) დაახლოებით 700 ერთეული იწარმოება, ამერიკის შეერთებული შტატები კი მიზნად ისახავს 2030 წლის ბოლოსთვის ეს მაჩვენებელი 2000-მდე გაზარდოს. აშშ-ის მარაგები მნიშვნელოვნად ამოწურა ირანთან ბოლოდროინდელმა ომმა, აგრეთვე უკრაინისთვის გაწეულმა დახმარებამ და მოკავშირეების (მათ შორის, პოლონეთის) მიერ განხორციელებულმა შესყიდვებმა. გარდა ამისა, თავად ამერიკული ძალებიც დაინტერესებულნი არიან საკუთარი რეზერვების შევსებითა და გაზრდით, რამაც საწარმოო პარტნიორის შერჩევის საჭიროება შექმნა.

ამავე რაკეტების ადგილზე წარმოების დაწყებას გერმანიაც ცდილობს.

ამჟამად პოლონეთი „პეტრიოტის“ ორ ბატარეას ფლობს და კიდევ ექვსის მიღებას ელოდება. უახლეს მომავალში რაკეტების მიწოდებაში მოსალოდნელი შეფერხებების გამო, პოლონეთის სამხედრო უწყება ალტერნატიულ გზებსაც ეძებს. მაისის შუა რიცხვებში, შეიარაღების სააგენტოს ხელმძღვანელის მოადგილემ, გენერალმა მიხალ მარცინიაკმა განაცხადა, რომ ამ მიმართულებით კონტრაქტორი უკვე შერჩეულია.

ტომჩიკმა ასევე აღნიშნა, რომ ამერიკელებმა დიდი ინტერესი გამოხატეს იმ ვარიანტის მიმართ, რომლის მიხედვითაც პოლონეთმა, შესაძლოა, „ჰაიმარსის“ სარაკეტო სისტემებისთვის საჭირო შორი მოქმედების საბრძოლო მასალები და „ჰელფაირსის“ რაკეტები აწარმოოს, რომლებიც, სხვა პლატფორმებთან ერთად, „აპაჩის“ ტიპის ვერტმფრენებზეც გამოიყენება.

პოლონეთი აქტიურად ცდილობს, უცხოეთში შეძენილი თავდაცვითი აღჭურვილობის, მათ შორის კომპონენტებისა და სერვისის წარმოება საკუთარ ქვეყანაში გადაიტანოს. ამ კონტექსტში, ქალაქ დემბლენში ამერიკული „აბრამსის“ ტიპის ტანკებში გამოყენებული ძრავების სარემონტო ცენტრის შექმნაა დაგეგმილი.