30 მაისს მომხდარი ქურდობის შემდეგ, მუზეუმმა უცნობი პირების წინააღმდეგ საჩივარი შეიტანა.
30 მაისს, მეცის პომპიდუს ცენტრიდან მაურიციო კატელანის ნამუშევარი მოიპარეს. ეს არის კედელზე ნაცრისფერი წებოვანი ლენტით მიკრული ბანანი, რომელიც 2019 წელს Art Basel Miami Beach-ზე გამართული მისი პერზენტაციის შემდეგ, არაერთხელ გახდა მწვავე განხილვის საგანი. მუზეუმის განცხადებით, შაბათს, დაახლოებით 14 საათზე, დაცვის თანამშრომელმა შეამჩნია, რომ ბანანი ადგილზე აღარ იყო. პომპიდუს ცენტრმა, ქურდობის ფაქტზე, საჩივარი უცნობი პირების წინააღმდეგ შეიტანა.
მუზეუმი განმარტავს, რომ „ნამუშევრის ღირებულება მისი ნამდვილობის სერტიფიკატსა და გამოფენის მარეგულირებელ პროტოკოლში მდგომარეობს და არა მის მალფუჭებად კომპონენტში“. მიუხედავად ამისა, მუზეუმი გმობს მომხდარ ქმედებას, რომელიც „გამოფენილი ნამუშევრებისადმი პატივისცემას ლახავს და დამთვალიერებლებს გამოფენის დროს მიღებული შთაბეჭდილებების ნაწილს დროებით უკარგავს“. თუმცა, მეცის საგამოფენო ცენტრი საზოგადოებას ამშვიდებს და იუწყება, რომ „არანაირი შეუქცევადი ზიანი არ დამდგარა“ და „მალფუჭებადი ელემენტი“ მაქსიმალურად სწრაფად ჩანაცვლდა.
ბანანი 2025 წელსაც შეჭამეს
პომპიდუს ცენტრში „კომიკოსი“ გამოფენილია ექსპოზიციის – „უსასრულო კვირა: მაურიციო კატელანი და პომპიდუს ცენტრის კოლექცია“ – ფარგლებში. შექმნის დღიდან, „ნამუშევარმა“ მსოფლიოში არაერთგვაროვანი რეაქცია გამოიწვია და რამდენიმე ინციდენტიც მოჰყვა. „მასში მონაწილეობდნენ დამთვალიერებლები ან პერფორმერები, რომლებმაც გამოფენილი ბანანი მოხსნეს ან შეჭამეს“, – ნათქვამია მუზეუმის პრეს-რელიზში. მუზეუმის განცხადებით, პომპიდუს ცენტრის ერთ-ერთმა დამთვალიერებელმა ის 2025 წელსაც შეჭამა.
მას შემდეგ, რაც 2019 წელს თავდაპირველად 120 000 დოლარად გაიყიდა, 2024 წელს „კომიკოსი“ კრიპტოვალუტის პლატფორმის დამფუძნებელმა 6,2 მილიონ დოლარად (5,3 მილიონი ევრო) შეიძინა. ამის შემდეგ მან ბანანი შეჭამა და ამის ამსახველი ვიდეო სოციალურ ქსელში გამოაქვეყნა.
https://www.franceinfo.fr/culture/au-centre-pompidou-metz-un-visiteur-vole-la-banane-faisant-partie-de-l-uvre-comedian-de-maurizio-cattelan-deja-vendue-a-6-2-millions-de-dollars_8038388.html