ნარვაში, რუსეთთან საზღვარზე, ესტონეთის თავდაცვის ძალების ახალი ბაზის მშენებლობა მიმდინარე წლის ბოლოს დაიწყება. ეს განცხადება ქვეყნის თავდაცვის მინისტრმა, ჰანო პევკურმა („რეფორმის პარტია“) იდა-ვირუუმას მაზრაში სტუმრობის დროს გააკეთა.
ესტონეთის ამ აღმოსავლეთ რეგიონს პევკური სამშაბათს, 2ივნისს ეწვია, რათა ნარვის საქალაქო ხელისუფლების ხელმძღვანელებთან ახალი ბაზის საკითხი განეხილა.
თავდაცვის სამინისტროს პრეს-რელიზში აღნიშნულია, შეხვედრაზე მიღწეული შეთანხმების თანახმად, უკვე ივნისიდან, ქალაქ ნარვის მთავრობა ამ პროექტს მხარში ამოუდგება.
დაწყებულია მზადება ღია ტენდერის ჩასატარებლად, რაც ხელს შეუწყობს ნარვაში ესტონეთის თავდაცვის ძალების ობიექტების მშენებლობის დაჩქარებას.
პევკურის თქმით, ბაზა გააძლიერებს ქვეყნის თავდაცვას და სასაზღვრო ქალაქში გაზრდის სახელმწიფოს წარმომადგენლობას. „ნარვაში ჩვენი ყოფნის გაფართოება მნიშვნელოვანია, რადგან ესტონეთი თავდაცვის საკითხებს საკუთარი ტერიტორიის პირველივე მეტრიდან სერიოზულად ეკიდება “, – ციტირებენ მის სიტყვებს ესტონური მედიასაშუალებები.
„თავდაცვის ძალების მუდმივი ყოფნა გააძლიერებს უსაფრთხოებას და ადგილობრივ მცხოვრებლებს მეტ თავდაჯერებულობას შესძენს. დარწმუნებული ვარ, რომ ნარვასა და მის შემოგარენში სამხედრო ბაზის დაფუძნება რეგიონში მეტ აქტიურ ადამიანს მოიზიდავს და ეკონომიკას წაახალისებს“.
“პატარა” ბაზა
ნარვას მცხოვრებლებთან გამართულ შეხვედრაზე მინისტრმა უარყო, რომ ბაზა „დიდი“ იქნება და ქალაქში ათასობით ჯარისკაცი განთავსდება.
„მსმენია სხვადასხვა მონაყოლი, თითქოს ეს ძალიან დიდი ბაზა იქნება, მაგრამ ასე არ არის. რაღაც უზარმაზარ ბაზას ნამდვილად არ ვაშენებთ. ის მცირე ზომის იქნება“ – განმარტა მინისტრმა და დასძინა, რომ ბაზა ნარვის გარეუბანში, კადასტიკის ინდუსტრიულ ზონაში, ტიიგის ქუჩაზე აშენდება.
მისივე თქმით, მთავარ ობიექტებზე მუშაობა მომავალი წლის იანვარში ან თებერვალში დაიწყება.
შეხვედრის შემდეგ, ნარვის საქალაქო საბჭოს დამოუკიდებელმა დეპუტატმა, კატრი რაიკმა სოციალურ ქსელში დაწერა: „კადასტიკში (ნარვა) განთავსდება ასეულის ზომის ქვედანაყოფი – 100-დან 120-მდე პერსონალით, ამასთან მძიმე სამხედრო ტექნიკა ნარვაში მუდმივად არ იქნება ბაზირებული“.
„უსაფრთხოების სიგნალის“ გაგზავნა
გასულ წელს, ესტონეთის თავდაცვის ძალების შტაბის უფროსმა, გენერალ-მაიორმა ვაჰურ კარუსმა განმარტა, თუ რატომ შენდება ბაზა რუსეთთან საზღვარზე.
„ესტონელი ჯარისკაცები განთავსდებიან ჩვენს ერთ-ერთ უდიდეს ურბანულ ზონაში – ქალაქში, რომელიც უშუალოდ საზღვარზე მდებარეობს. ეს იქნება ჩვენი მხრიდან უსაფრთხოდ ყოფნის სურვილის დემონსტრირება. მაგრამ ეს ასევე იქნება კომპონენტი, რაც ნარვას ჩვენგან აკლია – ესტონეთის თავდაცვის ძალები აქ, პრაქტიკულად, არ არიან წარმოდგენილნი. ნარვა ერთადერთი დიდი ესტონური ქალაქია, რომელიც ასეთ მდგომარეობაში იმყოფება“, – განუცხადა მან ესტონეთის საზოგადოებრივ მაუწყებელს (ERR).
ახალ ბაზაზე მოკავშირეების ქვედანაყოფებიც განლაგდებიან.
„ისინი ძალიან არიან მოწადინებულნი, განთავსდნენ ისეთ ადგილებში, როგორიცაა ნარვა და იიჰვი – ამაში მათთვის ერთგვარი ეგზოტიკური მიმზიდველობაა. მაგრამ ჩვენთვის მთავარი ის არის, რომ მოკავშირეთა ქვედანაყოფები ინტეგრირებულნი არიან ესტონეთის თავდაცვის ძალებთან, ასე რომ, სადაც ჩვენ მივდივართ, ისინიც იქ მოდიან“, – დასძინა მან.
https://news.err.ee/1610045225/construction-of-defense-force-s-narva-base-will-start-this-year