შვედეთის პარლამენტმა (რიქსდაგმა) ტარტუს ციხეის იჯარის საკითხზე ესტონეთთან გაფორმებული შეთანხმების რატიფიცირება მოახდინა, რაც მნიშვნელოვანი ეტაპია შვედეთის შიდა ციხეების გადატვირთულობის შესამსუბუქებლად და ტარტუს ციხის ფუნქციონირების შესანარჩუნებლად.
ესტონეთის იუსტიციისა და ციფრული ტექნოლოგიების მინისტრის, ლიისა-ლი პაკოსტას განცხადებით, შვედეთის პარლამენტის გადაწყვეტილება ესტონეთის პენიტენციური სისტემისა და ორი ქვეყნის თანამშრომლობის მიმართ ნდობის გამოხატულებას წარმოადგენს.
„შვედეთის პარლამენტის გადაწყვეტილება ჩვენს შორის მიღწეული შეთანხმების ძალაში შესვლისკენ გადადგმული მნიშვნელოვანი ნაბიჯია. ტარტუს ციხის მუშაობის გაგრძელება ესტონეთს თავისი პენიტენციური სისტემის უნიკალური ინფრასტრუქტურის და ციხეების სამსახურის პროფესიული შესაძლებლობების გაძლიერების საშუალებას აძლევს. ეს არის თანამშრომლობა, რომელიც ორმხრივ ნდობას ეფუძნება და ორივე ქვეყნის ინტერესებში შედის“, – განაცხადა პაკოსტამ.
შეთანხმების ძალაში შესასვლელად საჭიროა, მისი რატიფიცირება ესტონეთის პარლამენტმაც (რიიგიკოგუ) მოახდინოს, სადაც ამ საკითხზე საბოლოო კენჭისყრა 10 ივნისს არის დაგეგმილი. ამის შემდეგ დოკუმენტი გამოსაქვეყნებლად პრეზიდენტ ალარ კარისს გადაეცემა.
მას შემდეგ, რაც შეთანხმების რატიფიცირებას ორივე ქვეყანა მოახდენს, თანამშრომლობის დასაწყებად მზადება დაიწყება. ეს გულისხმობს საორგანიზციო ღონისძიებებს, პერსონალის შერჩევასა და ტრენინგს, ასევე ესტონეთისა და შვედეთის ციხეების სამსახურებს შორის პრაქტიკულ კოორდინაციას პატიმართა მისაღებად.
ტარტუს ციხეში პირველი პატიმრების მიღება აგვისტოშია ნავარაუდევი. ციხე ეტაპობრივად, კვარტალში მაქსიმუმ 100 პატიმრის სიხშირით შეივსება.
ტარტუს ციხის იჯარის შესახებ შეთანხმებას ესტონეთმა და შვედეთმა ხელი 2025 წლის 18 ივნისს მოაწერეს. შეთანხმება ითვალისწინებს ტარტუს ციხეში 400-მდე საკნის გამოყენებას 600-მდე შვედი პატიმრის განსათავსებლად. შეთანხმების მოქმედების ვადა ხუთი წელია, რომელიც, შესაძლოა, კიდევ სამი წლით გაგრძელდეს.
ტარტუს ციხეში განსათავსებელი პატიმრების კონტინგენტს ორივე ქვეყნის ხელისუფლება ერთობლივად შეარჩევს. ესტონეთში არ გადაიყვანენ ტერორიზმისთვის მსჯავრდებულებს, აგრეთვე მათ, ვისზეც არსებობს ვარაუდი, რომ დანაშაულებრივ ქმედებებს ციხეში ყოფნის დროსაც გააგრძელებენ. ასევე არ მიიღებენ ქალებს და არასრულწლოვნებსა. უცხოელი პატიმრები იქნებიან სრულწლოვანი მამაკაცები, რომლებიც ხანგრძლივ სასჯელს, ძირითადად ძალადობრივი ან ნარკოტიკებთან დაკავშირებული დანაშაულებისთვის იხდიან.
უცხოელ პატიმრებთან დაკავშირებულ ყველა ხარჯს შვედეთის სახელმწიფო დაფარავს. ესტონეთის ტერიტორიაზე არცერთი პატიმარი არ გათავისუფლდება – სასჯელის ვადის ამოწურვამდე მათ ჯერ შვედეთში დააბრუნებენ.
https://news.err.ee/1610046013/swedish-parliament-approves-prison-leasing-agreement-with-estonia