ესტონეთის პარლამენტმა (რიიგიკოგუ) დაამტკიცა საკანონმდებლო ცვლილებები, რომლებიც ესტონეთის ციხეებში უცხო ქვეყნებიდან გადმოყვანილი პატიმრების განთავსების საშუალებას იძლევა. პლენარულ სხდომაზე ასევე კენჭი ეყარა შვედეთთან დადებული შეთანხმების რატიფიცირებას, რომელიც ესტონეთის ციხეებში შვედი პატიმრების განთავსებას ითვალისწინებს.
საკანონმდებლო ცვლილებებს რიიგიკოგუს 52-მა წევრმა დაუჭირა მხარი, 35-მა კი წინააღმდეგ მისცა ხმა.
კანონპროექტის განმარტებითი ბარათის თანახმად, საერთაშორისო შეთანხმების არსებობის შემთხვევაში, შესაძლებელი გახდება უცხოური სასამართლოების მიერ შეფარდებული სასჯელის ესტონეთის ციხეებში მოხდა. ეს არის პრაქტიკა, რომელსაც „ციხის გაქირავებას“ უწოდებენ.
„ციხის გაქირავების“ მიზანია, ერთი მხრივ, უზრუნველყოს ტარტუს ციხის ინფრასტრუქტურის დანიშნულებისამებრ გამოყენება და ციხის პერსონალის შენარჩუნება, მეორე მხრივ კი, საკანონმდებლო ცვლილებები არასრული დატვირთვით გამოწვეული სასჯელაღსრულების დაწესებულებების მაღალი ხარჯების შემცირებას და სახელმწიფო ფინანსების მდგრადობის ხელშეწყობას ემსახურება.
რიიგიკოგუს მიერ მოწონებული საკანონმდებლო ცვლილებები პრეზიდენტ ალარ კარისს გადაეცემა ხელმოსაწერად და გამოსაქვეყნებლად.
გასულ კვირას, შვედეთის პარლამენტმა საბოლოოდ დაამტკიცა ესტონეთსა და შვედეთს შორის საპატიმრო ადგილების გაქირავების შესახებ შეთანხმება.
ორივე ქვეყანაში შეთანხმების რატიფიცირების შემდეგ, თანამშრომლობისთვის პრაქტიკული მზადება დაიწყება. ეს გულისხმობს ორგანიზაციული საკითხების მოგვარებას, პერსონალის შერჩევასა და გადამზადებას, ასევე ესტონეთისა და შვედეთის სასჯელაღსრულების სამსახურებს შორის კოორდინირების გაღმავებას, რათა პატიმრების გადაყვანა შეუფერხებლად განხორციელდეს.
ტარტუს ციხეში პირველი პატიმრების ჩაყვანა აგვისტოში იგეგმება. ციხე, კვარტალში 100-მდე პატიმრის დამატებით, ეტაპობრივად შეივსება.
ტარტუს ციხის იჯარის შესახებ შეთანხმებას ესტონეთმა და შვედეთმა ხელი 2025 წლის 18 ივნისს მოაწერეს. შეთანხმება ითვალისწინებს ტარტუს ციხის 400-მდე საკნის გამოყენებას, 600-მდე შვედი პატიმრის განსათავსებლად. შეთანხმების მოქმედების ვადა ხუთი წელია, რომელიც, შესაძლოა, კიდევ სამი წლით გაგრძელდეს.
ტარტუს ციხეში განსათავსებელი პატიმრების კონტინგენტს ორივე ქვეყნის ხელისუფლება ერთობლივად შეარჩევს. ესტონეთში არ გადაიყვანენ ტერორიზმისთვის მსჯავრდებულებს, აგრეთვე მათ, ვისზეც არსებობს ვარაუდი, რომ დანაშაულებრივ ქმედებებს ციხეში ყოფნის დროსაც გააგრძელებენ. ასევე არ მიიღებენ ქალებს და არასრულწლოვნებსა. უცხოელი პატიმრები იქნებიან სრულწლოვანი მამაკაცები, რომლებიც ხანგრძლივ სასჯელს, ძირითადად ძალადობრივი ან ნარკოტიკებთან დაკავშირებული დანაშაულებისთვის იხდიან.
უცხოელ პატიმრებთან დაკავშირებულ ყველა ხარჯს შვედეთის სახელმწიფო დაფარავს. ესტონეთის ტერიტორიაზე არცერთი პატიმარი არ გათავისუფლდება – სასჯელის ვადის ამოწურვამდე მათ ჯერ შვედეთში დააბრუნებენ.
https://news.err.ee/1610051764/riigikogu-passes-law-allowing-estonian-prison-space-to-be-rented-to-other-countries