14 ივნისს, კოსოვოს პოლიციამ 1999 წლის ომის დანაშაულში მონაწილეობაში ეჭვმიტანილი ხუთი სერბი დააკავა, რომელთაგან ოთხი ყოფილი პოლიციელია. ამ ინფორმაციას სააგენტო „ფრანს-პრესი“ სასამართლო წყაროზე დაყრდნობით ავრცელებს.
პროკურორის განმარტებით, ეს არის პირველი დაკავებები სისხლის სამართლის საქმის ფარგლებში, რომელიც 1999 წლის იანვარში, სოფელ რეჩაკში სერბული ძალების მიერ 40-ზე მეტი მშვიდობიანი კოსოვოელი მოქალაქის მასობრივ მკვლელობებს შეეხება.
„ეს პირები იდენტიფიცირებულნი არიან, როგორც სერბეთის პოლიციის სპეცრაზმის წევრები, რომელებიც 1999 წლის 5 იანვარს რეჩაკში ჩატარებულ ოპერაციაში მონაწილეობდნენ“, – აღნიშნა პროკურორმა ილირ მორინამ, რომლის ნათქვამსაც „ფრანს-პრესი“ ციტირებს.
ეს რეჩაკის ხოცვა-ჟლეტის საქმეზე კოსოვოს პროკურატურის მიერ დაწყებული მეორე გამოძიებაა. 21 სერბის, მათ შორის სერბეთის პოლიციის ყოფილი მაღალჩინოსნების, წინააღმდეგ აღძრული საქმის განხილვა 20 ივლისს დანიშნულ წინასასამართლო სხდომაზე იგეგმება. ბრალდებულებს მშვიდობიანი მოსახლეობის სიკვდილით დასჯასა და ომის სხვა დანაშაულებში მონაწილეობაში ედებათ ბრალი.
14 ივნისს დაკავებული ხუთი პირის წინააღმდეგ აღძრული საქმე უკვე „რეჩაკ 2“-ად (Rechak 2) მოინათლა.
1999 წლის იანვარში მომხდარი ე.წ. „რეჩაკის ხოცვა-ჟლეტა“ კოსოვოს უახლეს ისტორიაში გარდამტეხ მომენტად იქცა. ამ სოფელში, რომელიც დედაქალაქ პრიშტინადან დაახლოებით 30 კილომეტრში მდებარეობს, სერბმა სამხედროებმა და პოლიციამ 45 მშვიდობიანი ალბანელი მოკლეს. ამ ინფორმაციას „რადიო თავისუფლების“ ალბანური სამსახური ავრცელებს.
„ასოშიეითიდ პრესის“ ცნობით, რეჩაკის მოვლენებმა 1998-1999 წლებში მიმდინარე კოსოვოს ომში საერთაშორისო ჩარევა გამოიწვია. რეჩაკში მომხდარი მკვლელობების აღსაწერად ტერმინი „მასობრივი მკვლელობები“ კოსოვოში ეუთო-ს მისიის იმდროინდელმა ხელმძღვანელმა, უილიამ უოკერმა გამოიყენა, რამაც გზა გაუხსნა სერბული ძალების წინააღმდეგ მიმართულ ნატოს 78-დღიან დაბომბვებს. იმ დროს კოსოვო სერბეთის პროვინცია იყო.
პირველი გამოძიების საბრალდებო დასკვნაში, რომელსაც სააგენტო „ფრანს-პრესი“ გაეცნო, სერბეთის არმიისა და პოლიციის 21 ყოფილ წევრს ბრალად ედებათ: მკვლელობები, წამებები, არაადამიანური მოპყრობა, ქონების განადგურება და მშვიდობიანი ალბანელების კოსოვოდან დეპორტირება.
ბრალდებულებს შორის არიან სერბეთის პოლიციის ყოფილი უფროსი, ობრად სტევანოვიჩი და დაზვერვის ყოფილი უფროსი, რადე მარკოვიჩი, ასევე ორი გენერალი და ორი პოლკოვნიკი.
ვინაიდან ეს 21 ბრალდებული კოსოვოს ხელისუფლებისთვის მიუწვდომელია, პროკურორებმა მოითხოვეს, რომ სასამართლო პროცესი მათ დაუსწრებლად გაიმართოს.
სააგენტო „ფრანს-პრესის“ ცნობით, კოსოვოს კონფლიქტის დროს 13 000-ზე მეტი ადამიანი დაიღუპა, რომელთა უმეტესობაც კოსოვოელი იყო.
https://bntnews.bg/news/petima-sarbi-sa-arestuvani-po-obvineniya-vav-voenni-prestapleniya-v-kosovo-1398440news.html