ჯარის ბანაკი ახალგაზრდებს აძლევს საშუალებას, გაიზიარონ ის სიამაყე, რომელსაც განიცდის თითოეული სამხედრო მოსამსახურე სამშობლოს სამსახურში, – ამის შესახებ საქართველოს პრემიერ-მინისტრმა ირაკლი კობახიძემ ჯარის ბანაკი 2026-ის გახსნის ღონისძიებაზე სიტყვით გამოსვლისას განაცხადა.
მთავრობის მეთაურმა ბანაკის მონაწილეებს წარმატებები უსურვა და პროექტის ორგანიზატორებს – თავდაცვისა და განათლების, მეცნიერებისა და ახალგაზრდობის სამინისტროებს მადლობა გადაუხადა.
„დარწმუნებული ვარ, ეს დღეები თქვენთვის იქნება ძალიან საინტერესო, სასიამოვნო და დაუვიწყარი. მთლიანობაში 1700 მოსწავლეს მასპინძლობს ჯარის ბანაკი როგორც კოჯორში, ისე საჩხერის სამთო მომზადების სკოლაში. თითოეულ თქვენგანს გექნებათ საშუალება, ადგილზე ნახოთ, თუ როგორია ჯარისკაცის ცხოვრება, რა ღირებულებებს ეზიარება სამხედრო მოსამსახურე. ძალიან მნიშვნელოვანია, რომ ჯარის ბანაკს წელს პირველად დაემატა „საპატრიარქო საათის“ კომპონენტი, სადაც ჩვენს ეროვნულ და სულიერ ღირებულებებზე საუბრის საშუალება გექნებათ“, – განაცხადა ირაკლი კობახიძემ.
ჯარის ბანაკის გახსნის ღონისძიებაში პრემიერ-მინისტრმა პრეზიდენტ მიხეილ ყაველაშვილთან, პარლამენტის თავმჯდომარე შალვა პაპუაშვილთან, ვიცე-პრემიერთან, თავდაცვის მინისტრ ირაკლი ჩიქოვანსა და თავდაცვის ძალების მეთაურთან, გენერალ-ლეიტენანტ გიორგი მათიაშვილთან ერთად მიიღო მონაწილეობა.
ჯარის ბანაკის გახსნის ღონისძიებას აღმასრულებელი და საკანონმდებლო ხელისუფლების წევრები და საპატრიარქოს წარმომადგენლები დაესწრნენ.
პრემიერ-მინისტრმა, პრეზიდენტმა და პარლამენტის თავმჯდომარემ ბანაკში ახალგაზრდებისთვის გათვალისწინებული სასწავლო ინვენტარი და აღჭურვილობა დაათვალიერეს.
