აშშ-ის პრეზიდენტმა, დონალდ ტრამპმა ნატოს მოკავშირეები გააკრიტიკა. საუბრისას ტრამპმა აღნიშნა, რომ ალიანსის წევრი ქვეყნების მხრიდან დახმარებაზე უარის თქმა „სულელური ნაბიჯია“ და დასძინა, რომ აშშ-მა შესაძლოა პასუხად ანალოგიური პოზიცია დაიკავოს.
ტრამპმა განსაკუთრებული უკმაყოფილება გამოთქვა კირ სტარმერის მისამართით. მისი თქმით, სტარმერმა მხარდაჭერაზე უარი თქვა და მზადყოფნა მხოლოდ გამარჯვების შემდეგ გამოთქვა, რაზეც ტრამპმა მკაცრად უპასუხა: „როცა ჩვენ გავიმარჯვებთ, თქვენ აღარ დაგვჭირდებით“.
პრეზიდენტმა ხაზი გაუსვა, რომ ბრიტანელი ლიდერი, მისი აზრით, უინსტონ ჩერჩილის დონის პოლიტიკოსი არ აღმოჩნდა და აღნიშნა, რომ სტარმერის ამ პოზიციამ დიდი ბრიტანეთის მოქალაქეების უკმაყოფილება გამოიწვია.
პრეზიდენტმა ასევე გააკრიტიკა იტალია და გერმანია. „იტალია ძალიან ცუდად მოიქცა. გერმანია – ძალიან ცუდად. ნატო ჩვენთან არ იყო“, – განაცხადა ტრამპმა.
მისივე თქმით, აშშ ყოველწლიურად ასობით მილიონ დოლარს ხარჯავს მოკავშირეების დასაცავად რუსეთისგან, თუმცა სანაცვლოდ მხოლოდ უარს იღებს.
ტრამპმა ხაზგასმით აღნიშნა, რომ ნატოს წევრი ქვეყნების პოზიცია „სულელურია“, რადგან, მისი აზრით, აშშ-საც აქვს უფლება, საჭიროების შემთხვევაში იგივე უარი უთხრას მათ.