აშშ-ის პრეზიდენტის ადმინისტრაცია ესპანური საქონლის სიას ამზადებს, რომელზეც შესაძლოა, ემბარგო დაწესდეს, – ამის შესახებ ინფორმაციას გამოცემა „პოლიტიკო“ ავრცელებს.
აშშ-ის ერთ-ერთმა ოფიციალურმა პირმა გამოცემისთვის გაგზავნილ ელექტრონულ წერილში განაცხადა, რომ ფინანსთა სამინისტრო, აშშ-ის სავაჭრო წარმომადგენლის ოფისი და ვაჭრობის სამინისტრო დონალდ ტრამპს უახლოეს დღეებში წარუდგენენ „ესპანური პროდუქციის ვარიანტებს“, რომლებზეც ემბარგოს დაწესება შეიძლება.
ცნობისთვის, დონალდ ტრამპმა ესპანეთთან სავაჭრო ურთიერთობების შეწყვეტის ინიციატივა ანკარაში, ნატო-ს სამიტის პარალელურად გააჟღერა. ტრამპის თქმით, ეს ნაბიჯი მადრიდის გადაწყვეტილებას უკავშირდება, უარი თქვას ნატო-ს წევრი სახელმწიფოების შეთანხმების მხარდაჭერაზე, რომლის მიხედვითაც, ქვეყნებმა 2035 წლისთვის თავდაცვითი ხარჯები მშპ-ის 5%-მდე უნდა გაზარდონ.
ამასთან, ტრამპმა მარტში განაცხადა, რომ ფინანსთა მინისტრს, სკოტ ბესენტს ესპანეთთან ყველა სახის ურთიერთობის შეწყვეტა დაავალა. ამის მიზეზი გახდა მადრიდის გადაწყვეტილება, ვაშინგტონისთვის არ მიეცა უფლება, ირანზე თავდასხმისთვის აშშ-ისა და ესპანეთის მიერ ერთობლივად მართული სამხედრო ბაზები გამოეყენებინა.