თურქული მედიის ცნობით, სტამბოლის სანაპირო ზოლსა და შავი ზღვის რეგიონში უამინდობის გამო, აქ მყოფ მრავალ დამსვენებელს ზღვაში შესვლა აეკრძალა.
ადგილობრივმა ხელისუფლებამ ზღვაში ცურვა აკრძალა შავი ზღვის სანაპიროზე მდებარე საკურორტო დასახლება შილეში, რომელიც ზაფხულის ცხელ დღეებში ერთ-ერთი ყველაზე პოპულარული დასასვენებელი ადგილია. შილეს რაიონში რამდენიმე პლაჟია, რომლებსაც მრავალი ადგილობრივი და უცხოელი ტურისტი სტუმრობს ერთდღიანი მოგზაურობისა თუ ხანგრძლივი დასვენებისთვის. აკრძალვა აქ დიდი ტალღებისა და წყალქვეშა დინებების გამო დაწესდა.
თურქული ტელეარხ NTV-ის ცნობით, შილეს მუნიციპალიტეტმა გამოსცა განკარგულება, რომელიც სოფლის მიმდებარე ტერიტორიაზე არსებული პლაჟებიდან ზღვაში შესვლას კრძალავს. გამონაკლისს მხოლოდ აიაზმასა და აღვას პლაჟები წარმოადგენს. იმავე ტელეარხის ინფორმაციით, განკარგულებაში აღნიშნულია, რომ არსებულ კლიმატურ პირობებში ზღვაში ცურვა საფრთხის შემცველია.
შილეს გარდა, ზღვაში შესვლაზე აკრძალვა მარმარილოს ზღვის სანაპიროს კიდევ სამ რაიონში დაწესდა. ის ეხება ქალაქებს თექირდაღს, ქოჯაელსა და ქირქლარელს.
შავი ზღვის ქალაქების: ტრაპზონის, ორდუს, გირესუნის, რიზეს, ართვინისა და სამსუნის მუნიციპალიტეტებმაც გამოაცხადა, რომ პლაჟებზე, ყურეებში და სანაპირო ზოლის გასწვრივ ცურვა აიკრძალება.
ცურვის აკრძალვის მთავარი მიზეზი არა წვიმა, არამედ ზღვაზე არსებული დიდი ზომის ტალღები და ქარია. „რეგიონში ძლიერი ქარია. შალფაზარისა და აქჩააბათის რაიონებში წვიმს, ზღვა კი ძალიან ღელავს. წვიმა შალფაზარის რაიონიდან თანდათან ცენტრისკენ გადაადგილდება“, – აღნიშნა მე-11 რეგიონული მეტეოროლოგიური სამმართველოს დირექტორმა, დოქტორმა ჰასან ჯევჰერმა.
მოსახლეობის უსაფრთხოების მიზნით, ზღვაში შესვლის აკრძალვა ზოგიერთ რაიონში მომდევნო რამდენიმე დღის განმავლობაშიც შენარჩუნდება.
https://bntnews.bg/news/turciya-zabrani-kapaneto-v-cherno-more-1401759news.html