აშშ-ის პრეზიდენტის დონალდ ტრამპის დაპირება, რომ უკრაინას ამერიკული Patriot-ის საჰაერო თავდაცვის რაკეტების წარმოების უფლებას მისცემს, უკრაინის პრეზიდენტ ვოლოდიმირ ზელენსკისთვის მნიშვნელოვანი პოლიტიკური გამარჯვებაა, თუმცა თავდაცვის ექსპერტების შეფასებით, მათი წარმოების დაწყებას შესაძლოა მინიმუმ ერთი წელი დასჭირდეს. სტატიას ამ შინაარსით Reuters-ი ავრცელებს.
მანამდე კი, რაკეტების სისტემების ქრონიკული დეფიციტის გამო, კიევს რთული გადაწყვეტილებების მიღება მოუწევს – რომელი ობიექტები დაიცვას პრიორიტეტულად, მაშინ როცა რუსეთი უკრაინის ქალაქებსა და ენერგეტიკულ ინფრასტრუქტურაზე მასიურ დარტყმებს განაგრძობს.
როგორც Reuters-ი იუწყება, Patriot-ი ერთადერთი შეიარაღების სისტემაა უკრაინის არსენალში, რომელსაც რუსული ბალისტიკური რაკეტების შეჩერება შეუძლია. უკრაინამ მიმდინარე თვეში რუსეთის მიერ გაშვებული 54 ბევრად უფრო სწრაფი ბალისტიკური რაკეტიდან მხოლოდ ოთხის ჩამოგდება შეძლო.
თუმცა, ტრამპის დაპირება კონკრეტულ დეტალებს არ შეიცავდა. აშშ-ის პრეზიდენტმა თავადაც აღიარა, რომ Patriot-ის რაკეტების მწარმოებელ კომპანიებთან, Lockheed Martin-თან და RTX-თან წინასწარი კონსულტაციები არ გაუვლია.
ექსპერტების შეფასებით, საწარმოო ხაზის შექმნა, ქარხნის აშენება და მომწოდებლების ქსელის ორგანიზება ნიშნავს, რომ ვერც Raytheon-ის მიერ წარმოებული Patriot PAC-2-ის და ვერც Lockheed Martin-ის უფრო თანამედროვე PAC-3-ის რაკეტების გამოშვება უახლოეს მომავალში უკრაინის პრობლემას ვერ გადაჭრის.
შედარებისთვის, 2024 წელს Raytheon-მა ევროპულ იარაღის მწარმოებელ კომპანია MBDA-სთან შეთანხმებას მიაღწია გერმანიაში PAC-2 სისტემისთვის GEM-T რაკეტების წარმოებაზე, თუმცა პირველი მიწოდებები 2027 წლის დასაწყისამდე არ არის მოსალოდნელი. ამასთან, გერმანიაში PAC-3-ის წარმოებაზე მოლაპარაკებებს ჯერჯერობით შედეგი არ მოჰყოლია.
ექსპერტების შეფასებით, ერთ-ერთი ქვეყანა, რომელსაც კიევისთვის პროცესის დაჩქარებაში დახმარება შეუძლია, გერმანიაა, რადგან ქვეყანამ PAC-2-ის გადამჭრელი რაკეტებისთვის საკუთარი წარმოების ჯაჭვი უკვე შექმნა.