გარე ძალებს აქვთ განცდა, რომ საქართველო განერიდა ომებს და ცდილობს, რაღაც დამოუკიდებელ თამაშს. ეს პოლიტიკური კოლექტიური იერიშიც – ევროპარლამენტში, PACE-ში, თუ ეუთოში, სწორედ ამითაა ნაკარნახევი, – განაცხადა გადაცემაში „EURO ანატომია“ ევროპასთან ინტეგრაციის კომიტეტის თავმჯდომარემ, ლევან მახაშვილმა.
კითხვაზე, ეუთოს საპარლამენტო ასამბლეის მიერ რეზოლუციით წამოყენებული მოთხოვნები რამდენად ადეკვატურია და უნდა გაითვალისწინოს თუ არა მოთხოვნები საქართველოს ხელისუფლებამ, მახაშვილმა აღნიშნა, რომ არათუ ადეკვატურია, პირდაპირ წინააღმდეგობაში მოდის თავად ეუთოს პრინციპებთან და საქმიანობასთანაც. მან მაგალითად სხვადასხვა ქვეყნანაში ჩატარებული არჩევნების შედეგები მოიყვანა, რომლებიც კრიტიკის მიუხედავად, ეუთოს რეზოლუციის ტექსტში არ ასახულა.
„გასული ორი წლის განმავლობაში ჩატარებული არც ერთი არჩევნები, ბულგარეთის, რუმინეთის, ჩეხეთის, პოლონეთის, უნგრეთის – როგორც ევროკავშირის წევრი ქვეყნების, ასევე კანდიდატი სახელმწიფოების: ბოსნია, ალბანეთი მოლდოვა – არც ერთი მათგანი საქართველოზე არა თუ უკეთესი არ იყო, ვთქვათ ორგანიზებით, რიგების მართვით, თავისუფლებით და ასე შემდეგ, არამედ პირიქით, უამრავი პრობლემა იყო ამ სახელმწიფოებში, მაგრამ საზოგადოებას რაიმე სმენია, ვინმესგან კომენტარი, რომელიმე რეზოლუციაში ჩაიწერა ან განცხადებები გაკეთებულა?!“, – აღნიშნა მახაშვილმა.
მისივე თქმით, ამგვარი ორმაგი მიდგომების მიზეზი არის ის, რომ საქართველომ გადაწყვიტა ომის მოჯადოებული წრიდან გამოსვლა.
„საქართველომ, ნაცვლად იმისა, რომ გამხდარიყო ომებისა და დაპირისპირებების ნორმის მონაწილე, თქვა, რომ ის არ აპირებს ამ ომებში ჩართვას და პირიქით, მას უნდა, რომ სახელმწიფო გადაარჩინოს. ამის შემხედვარე ამ ძალებს აქვთ განცდა, რომ საქართველო განერიდა ომებს და ცდილობს, რაღაც დამოუკიდებელ თამაშს. ეს პოლიტიკური კოლექტიური იერიშიც ევროპარლამენტში, PACE-ში, თუ ეუთოში, სწორედ ამითაა ნაკარნახევი“, – განაცხადა მახაშვილმა.