ევროპაში სქესობრივი გზით გადამდებ დაავადებათა შემთხვევების რიცხვი იზრდება. მაგალითად, გონორეით ინფიცირებულთა რაოდენობა, 2015 წლის შემდეგ, 300 პროცენტზე მეტით არის გაზრდილი. ყველაზე გავრცელებული დაავადება კი ქლამიდიოზია, რომელიც მნიშვნელოვნად ზრდის უშვილობის რისკს. ზაფხულის სეზონის დადგომასთან ერთად, ექსპერტები მოსახლეობას სიფრთხილისკენ და სექსუალური ურთიერთობების დროს მეტი პასუხისმგების გამოჩენისკენ მოუწოდებენ.
სქესობრივი გზით გადამდებ დაავადებათა გავრცელების ზრდასთან ერთად, ევროპაში მოსახლეობის იმ ჯგუფების სტრუქტურაც იცვლება, რომლებიც ამ დაავადებებით ყველაზე მეტად ზარალდებიან.
„დაავადებათა პრევენციისა და კონტროლის ევროპული ცენტრის თანამშრომლებმა დააფიქსირეს შემთხვევების მატება ჰეტეროსექსუალურ მოსახლეობაში, განსაკუთრებით ახალგაზრდებში, კერძოდ კი – ახალგაზრდა ქალებში. ეს, სავარაუდოდ, უმაღლეს სასწავლებლებში სწავლასა და სტუდენტურ საერთო საცხოვრებლებში ბინადრობასთან არის კავშირში“, – განაცხადა ჩეხეთის საზოგადოებრივი ჯანმრთელობის ეროვნული ინსტიტუტის სქესობრივი გზით გადამდები დაავადებების განყოფილების ხელმძღვანელმა, ჰანა ზაკოუცკამ.
ჩეხეთის მაჩვენებლები ევროპულ საშუალო მაჩვენებელზე ოდნავ უფრო უკეთესია. თუმცა, ზაფხულის მოგზაურობები და სარისკო სექსუალური ქცევისკენ მიდრეკილება ინფიცირების უფრო მაღალ რისკსაც აჩენს. ექსპერტები ორალური სექსის დროსაც კი უწევენ რეკომენდაციას პრეზერვატივების გამოყენებას და რეგულარულ ტესტირებას -, თანაც ყოველ სამ თვეში ერთხელ. რისკი დონე უფრო მაღალია იმ ადამიანებში, ვისაც რამდენიმე სექსუალური პარტნიორი ჰყავს.
არაკომერციული ორგანიზაცია Rozkoš bez rizika („სიამოვნება რისკის გარეშე“) უფასო ტესტირებას სთავაზობს როგორც სექს-მუშაკებს, ასევე ფართო საზოგადოების წარმომადგენლებს. მაგალითად, ეს ორგანიზაცია სხვადასხვა ფესტივალზე, როგორც წესი, რამდენიმე ასეულ მონაწილეს ტესტავს ხოლმე.
https://ct24.ceskatelevize.cz/clanek/domaci/roste-pocet-pripadu-sexualne-prenosnych-chorob-v-cele-evrope-375535