საქართველო უერთდება გაეროს წევრი 50-ზე მეტი ქვეყნის მოწოდებას რუსეთისადმი, დათანხმდეს უკრაინაში სრულ, დაუყოვნებლივ და უპირობო ცეცხლის შეწყვეტას. ერთობლივ განცხადებას, საქართველოსთან ერთად, ევროკავშირის წევრი ყველა სახელმწიფო, ასევე ავსტრალია, კანადა, ჰონდურასი, ისლანდია, იაპონია, ახალი ზელანდია, პანამა და სამხრეთ კორეა უჭერენ მხარს.
განცხადებაში დაგმობილია რუსეთის სრულმასშტაბიანი შეჭრა უკრაინაში და მხარდაჭერილია უკრაინის სუვერენიტეტი და ტერიტორიული მთლიანობა, მის საერთაშორისოდ აღიარებულ საზღვრებში.
შესაბამისი განცხადება დანიის საგარეო საქმეთა მინისტრმა, ლარს ლოკე რასმუსენმა გაავრცელა.
„ეს უაზრო ომი და მის შედეგად გამოწვეული უზარმაზარი ადამიანური ტანჯვა დაუყოვნებლივ შეიძლება, დასრულდეს. კატეგორიულად მოვუწოდებთ რუსეთს, უპასუხოს სრულ, დაუყოვნებლივ და უპირობო ცეცხლის შეწყვეტისკენ მოწოდებებს და განაახლოს მოლაპარაკებები უკრაინაში ყოვლისმომცველი, სამართლიანი და ხანგრძლივი მშვიდობის მისაღწევად, საერთაშორისო სამართლის, მათ შორის გაერო-ს წესდების შესაბამისად. ჩვენ კიდევ ერთხელ ვადასტურებთ ჩვენს მტკიცე მხარდაჭერას უკრაინის სუვერენიტეტისა და ტერიტორიული მთლიანობის მიმართ, მის საერთაშორისოდ აღიარებულ საზღვრებში. ამ განსაკუთრებულ დღეს, უკრაინის დამოუკიდებლობის დღეს, ჩვენ გავაგრძელებთ უკრაინის მტკიცე მხარდაჭერას. გაერო-ს წესდების შესაბამისად, სამართლიანი და ხანგრძლივი მშვიდობის ალტერნატივა არ არსებობს“, – განაცხადა ლარს ლოკე რასმუსენმა.