„ჩვენ აღარ ვიმღერებთ – ოდესღაც დიდი ყოფილა საქართველო, ვიმღერებთ, რომ საქართველო არის დიდი და ერთიანი“, – განაცხადა დღეს პრემიერ-მინისტრმა გიორგი კვირიკაშვილმა „დიდგორობა 2017“- ზე.
პრემიერ-მინისტრმა მოსახლეობას „დიდგორობა“ მიულოცა და აღნიშნა, რომ დღევანდელი დღე ქართველთა უდიდესი გამარჯვების დღეა, ეს არის სიმბოლო ჩვენი ქვეყნის ერთიანობის ძლიერების.
„მინდა ყველას მივულოცო „დიდგორობა“. ეს არის ქართველთა უდიდესი გამარჯვების დღე, ეს არის სიმბოლო ჩვენი ქვეყნის ერთიანობის ძლიერების. დავით აღმაშენებელმა ამ გამარჯვებას მიაღწია მიზანმიმართული, თანმიმდევრული შრომით პირველ რიგში, სიბრძნით და რა თქმა უნდა სიმამაცით. ჩვენ, ქართველებს ყოველთვის უნდა გვახსოვდეს, რომ თუ ჩვენ ვიქნებით ერთიანნი, მაშინ საქართველო იქნება ძლიერი, ამიტომ არის დღევანდელი დღე მნიშვნელოვანი და მინდა ჩვენს ქვეყანას ვუსურვო გაძლიერება, გამთლიანება და ჩვენ აუცილებლად გავმთლიანდებით, რა თქმა უნდა საქართველო იქნება ძლიერი. ჩვენ აღარ ვიმღერებთ ოდესღაც დიდი ყოფილა საქართველო, ვიმღერებთ რომ საქართველო არის დიდი, ძლიერი და ერთიანი“, – აღნიშნა პრემიერმა.