ყაზახეთის ქალაქ აქტობეში სპეცოპერაციის დროს ტერორიზმში ეჭვმიტანილი ხუთი პირი მოკლეს. ამის შესახებ ყაზახეთის ნაციონალური უსაფრთხოების კომიტეტის პრესსამსახური იტყობინება. უწყების განცხადებაში ნათქვამია, რომ ოთხი ეჭვმიტანილი საცხოვრებელი სახლის ბინაში მოკლეს მას შემდეგ, რაც ისინი პოლიციას არ ჩაბარდნენ და ცეცხლი გახსნეს. კიდევ ერთი ეჭვმიტანილი ქალაქის სხვა რაიონში საპატრულო ეკიპაჟზე თავდასხმის მცდელობისას მოკლეს.
5 ივნისს აქტობის ცენტრში შეიარაღებული პირები იარაღის ორ მაღაზიას და სამხედრო ნაწილს დაესხნენ თავს და ექვსი ადამიანი მოკლეს. ქალაქში კონტრტერორისტული ოპერაციის რეჟიმი გამოცხადდა, რა დროსაც სამართალდამცველებმა 13 სავარაუდო თავდამსხმელი მოკლეს და რვა ადამიანი დააკავეს. ყველა მათგანი ყაზახეთის მკვიდრია. ყაზახეთის პრეზიდენტმა ნურსულთან ნაზარბაევმა მომხდარს ტერორისტული აქტი უწოდა. ნაზარბაევის განცხადებით, “რადიკალური ფსევდორელიგიური მიმდინარეობის” წევრებმა ინსტრუქციები საზღვარგარეთიდან მიიღეს.