“პატრიოტთა ალიანსი”-ს ლიდერი ირმა ინაშვილი სოციალურ ქსელში პოსტს აქვეყნებს:
“იმედის კვირა” ამზადებს სიუჟეტს, რომლის ანონსიც შემდეგნაირად ჟღერს: “პატრიოტთა ალიანსი პუტინის კარზე”. მორიგჯერ მივმართავ ტელეკომპანია “იმედის” ხელმძღვანელობას: თქვენ იქეცით უფრო რეაქციულ მედია-საშუალებად, ვიდრე რუსთავი-2.
თავი დაანებეთ “ქართული ოცნების” პოლიტიკური ოპონენტებისათვის სხვადასხვა იარლიყების მიკერების მცდელობას. არავის კარზე არა ვართ ჩვენ და ეს გასაგებად აგიხსენით, როდესაც პარტიის ლიდერებმა ინტერვიუ მოგცეს. ჩვენ კი არა ვართ პუტინის კარზე, საქართველოს ხელისუფლებაა ბოკერიას იდეოლოგიის ნებაყოფლობითი მძევალი. მას ეშინია, რომ თუ აფხაზებთან და ოსებთან პირდაპირ დიალოგს დაიწყებს, ბოკერიები დასავლეთში პრორუსული ხელისუფლების და რუსი ოლიგარქის მთავრობის იარლიყს მიაკერებენ და ამ ფობიის გამო, ვერც აფხაზებთან ბედავენ ლაპარაკს, ვერც ოსებთან და ვერც რუსულ მხარესთან. საქართველოს ხელისუფლება იმდენად დაკომპლექსებულია, რომ უარი თქვა ჰუმანიტარულ დახმარებაზეც კი (თვითმფრინავზე) და მზად აღმოჩნდა, რომ წაღვერის ტყის ორჯერ მეტი მასივის დაწვას შეგუებოდა. თქვენ კი, “იმედის” ჟურნალისტები, იმის ნაცვლად, რომ რეალობას აშუქებდეთ, თხზავთ სრულიად აბსურდულ სცენარებს, გვთხოვთ ინტერვიუს, გვაკარგინებთ დროს და შემდეგ, ვხედავთ, რომ საერთოდ არ გჭირდებათ ეს ინტერვიუ, არც გვისმენთ.
კოლეგებო, დაასრულეთ ეს მარაზმი. დაასრულეთ რუსთავი-2-ობა! შექმენით ახალი, თავისუფალი ტელევიზია, თქვენ ამისი ყველა რესურსი გაქვთ, ფინანსურიც და ტექნიკურიც. გამოძვერით სახელისუფებო დაკვეთის წნეხიდან! კვირიკაშვილი- ბოკერიას იდეოლოგიის წნეხიდან!
მკაფიოდ მინდა გითხრათ: ჩვენ ვართ საქართველოს კარზე! და თუ ვსაუბრობთ პირდაპირ დიალოგზე აფხაზებთან, ოსებთან, რუსულ მხარესთან, ეს კავშირშია მხოლოდ საქართველოს ტერიტორიული მთლიანობის აღდგენის მიზანთან! ქვეყნის გამთლიანების მიზანთან და არა რაიმე სხვა სარგებელთან. გაიგეთ ეს! შეიგნეთ ეს! დაიჯერეთ ეს! და გაგვატარეთ, რომ დავიბრუნოთ სოხუმი და ცხინვალი, რომ გავაერთიანოთ ჩვენი ქვეყანა.”,-წერს ინაშვილი.