გამყოფი ხაზის მიმდებარე სოფლების საჭიროებებზე რეაგირების დროებითი სამთავრობო კომისიის გადაწყვეტილებით, აკრედიტირებულ საგანმანათლებლო პროგრამებზე ჩარიცხულ სტუდენტებს სწავლის გადასახადი სრულად დაუფინანსდებათ. აგრეთვე გაგრძელდება წინა წლებში ჩარიცხული სტუდენტების დაფინანსებაც. საქმე ეხება შიდა ქართლის მუნიციპალიტეტის სოფლებს: ხაშურს, გორს ქარელსა და კასპს. აგრეთვე დუშეთის, საჩხერის, ონისა და წალენჯიხის მუნიციპალიტეტების გამყოფ ხაზებთან მცხოვრებ ახალგაზრდებს.
„ოკუპაციისა და მავთულხლართების გავლების შედეგად ამ სოფლების მცხოვრებლებმა დაკარგეს წვდომა საკუთარ ქონებაზე, სასოფლო-სამეურნეო დანიშნულების მიწებზე და იმ შემოსავლის წყაროებზე, რომლითაც ეს ოჯახები მანამდე ირჩენდნენ თავს. სწორედ ეს არის ერთ-ერთი მთავარი მიზეზი, რომლის გამოც ოჯახების მიმართ, რომლებსაც შემოსავლის წყარო ფაქტობრივად აღარ აქვთ, კომისიას გვინდა ერთგვარი მხარდაჭერა გამოვხატოთ, რომ მათმა შვილებმა შეძლონ სწავლის გაგრძელება და პრობლემა არ შეექმნათ”, – აღნიშნავს დროებითი სამთავრობო კომისიის მდივანი, ოთარ კონჯარია.
მისივე ინფორმაციით, გადაწყვეტილება ეხება როგორც ბაკალავრიატის, აგრეთვე მაგისტრატურის აკრედიტირებულ საგანმანათლებლო პროგრამებს.