განათლების მინისტრი სკოლებში ბოლო პერიოდში დაფიქსირებულ დარღვევებს ეხმაურება და მშობლებს, პედაგოგებსა და სკოლების ადმინისტრაციებს მოუწოდებს, საგანმანათლებლო დაწესებულებებში რაიმე სახის თანხის აგროვებისგან თავი შეიკავონ. მინისტრის თქმით, ეს განსაკუთრებით მძიმე დანაშაულია და მსგავსი დარღვევების შესახებ განათლების სამინისტროში წლის განმავლობაში ასობით შეტყობინებას იღებს.
„ჩვენ მივაღწიეთ იმას, რომ ქართულ საგანმანათლებლო სისტემაში აბსოლუტურად დავფარეთ მთელი საჭიროება. სკოლას აქვს საშუალება ყველაფერი შეიძინოს და გააკეთოს, რაც სჭირდება საგანმანათლებლო პროცესისთვის, ამიტომ ეს გადმონაშთი – მშობლებისგან, თუ სხვა ხალხისგან რაიმე თანხის მოთხოვნა, არის აბსოლუტურად მიუღებელი. სამწუხაროდ, ცალკეული შემთხვევები არის და თითოეული ასეთი შემთხვევა იქნება გამოკვლეული და აუცილებლად დადგება პასუხისმგებლობის საკითხი.
ჩვენ ამ წლების განმავლობაში მივაღწიეთ სკოლის დეპოლიტიზაციას და შესაბამისად, ნებისმიერი ცალკეული პედაგოგის ან სკოლის ადმინისტრაციის რაიმე სახით აქტივობა, მიმართული ბავშვების ჩართვაზე პოლიტიკურ პროცესში, არის აბსოლუტურად მიუღებელი და აქაც ისეთივე მკაცრი იქნება ჩვენი რეაგირება.
კონკრეტულ შემთხვევებს რაც ბოლო პერიოდში დაფიქსირდა, კონკრეტულ სკოლაში საყვედური გამოეცხადა მასწავლებელს, გაფრთხილება მიეცა სკოლის ადმინისტრაციას და ყველა ასეთ შემთხვევას ჩვენ ბოლომდე მივყვებით აუცილებლად“, – აღნიშნავს ვიცე-პრემიერი.