პაოლო მალდინი – ასეთი სახის მატჩებში თამაში ყოველთვის დიდ სიამოვნებას მანიჭებს

ფეხბურთის მსოფლიო ვარსკვლავები იმედს გამოთქვამენ, რომ დღევანდელი თამაში საინტერესო და სანახაობრივი გამოვა. 
როგორც ტელეკომპანია „იმედს“ იტალიური ფეხბურთის ლეგენდარულმა მცველმა პაოლო მალდინიმ განუცხადა, ასეთ მატჩებში მონაწილეობა მას ყოველთვის დიდ სიამოვნებას ანიჭებს.
„საკმაოდ კარგ ფორმაში ვარ და სათამაშოდ მზად ვარ. ასეთი სახის მატჩებში თამაში ყოველთვის დიდ სიამოვნებას მანიჭებს“, – განაცხადა მალდინიმ.
საქართველოში ფეხბურთის სხვა ვარსკვლავებთან ერთად ასევე იმყოფება მილანის ყოფილი მცველი კაფუ. მან კახა კალაძესთან ნაცნობობას გაუსვა ხაზი.
„საქართველოში ჩამოსვლა და საქველმოქმედო მატჩში მონაწილეობა ჩემთვის ძალიან სასიამოვნოა. ქართველი ფეხბურთელებიდან ვიცნობ კახა კალაძეს, რომელთან ერთადაც მილანში წლების განმავლობაში ვთამაშობდი. იმედია, თამაში კარგი და სანახაობრივი გამოვა“, – განაცხადა ბრაზილიელმა ყოფილმა ფეხბურთელმა.