საქართველოს ფეხბურთის ფედერაცია საფეხბურთო კლუბ „ზუგდიდის“ მეკარის, შოთა მამინაშვილის გარდაცვალების გამო, მწუხარებას გამოთქვამს და დაღუპულის ოჯახის წევრებსა და ახლობლებს თანაგრძნობას უცხადებს.
ფედერაცია განცხადებას ავრცელებს, რომელსაც უცვლელად გთავაზობთ:
„1-ელ ოქტომბერს, მცხეთა პარკზე გასამართი ეროვნული ლიგა 2-ის შეხვედრა „ვიტ ჯორჯიასა“ და „ზუგდიდს“ შორის, მატჩის დაწყებამდე მომხდარი ტრაგიკული შემთხვევის გამო გადაიდო.
თამაშის დაწყებამდე შეუძლოდ გახდა ზუგდიდელთა მეკარე, შოთა მამინაშვილი, რომელიც გუნდის ექიმისა და სასწრაფო დახმარების გადაწყვეტილებით, დაუყოვნებლივ კლინიკაში გადაიყვანეს, თუმცა, სამწუხაროდ, მისი გადარჩენა ვერ მოხერხდა.
საქართველოს ფეხბურთის ფედერაცია ღრმა მწუხარებას გამოთქვამს შოთა მამინაშვილის დაღუპვის გამო და გულითადად თანაუგრძნობს დაღუპულის ოჯახის წევრებს, ახლობლებსა და მეგობრებს, საფეხბურთო კლუბ „ზუგდიდსა“ და მის გულშემატკივრებს“, – ნათქვამია სფფ-ის განცხადებაში.
„მცხეთა პარკზე“ მატჩის დაწყებამდე, სტუმართა გუნდის მეკარე, 31 წლის შოთა მამინაშვილი ცუდად გახდა და გონება დაკარგა. ფეხბურთელი საავადმყოფოში გადაიყვანეს, თუმცა მისი გადარჩენა ვეღარ მოხერხდა.